Северниот дел на Косово продолжува да биде блокиран речиси две недели откако Србите поставија барикади во знак на протест поради апсењето на поранешниот полицаец Дејан Пантиќ, пренесуваат косовските медиуми.
Од саботата, на 10 декември, кога беа поставени барикадите во Рударе, тие продолжуваат да бидат на клучните патишта кои водат до граничните точки, во Јариње и Брњак, кои продолжуваат да се затворени.
Министерот за внатрешни работи на Косово, Џељал Свечла, вчера предупреди на можноста за отстранување на барикадите, доколку КФОР не дејствува што е можно поскоро.
Свечла рече дека чекаат КФОР да дејствува што е можно поскоро, но додаде дека доколку тоа не се случи, Косово ќе ги отстрани.
„Тие [КФОР] бараа сами да ги отстранат барикадите. Сега чекаме да ја исполнат својата обврска. Но, откако поминаа 13 дена и имаме полицајци блокирани во Јариње и Брњак, деновите што се пребројуваат привршуваат. Верувам дека КФОР и меѓународниот фактор се посветени да го направат тоа што е можно поскоро. Но, за поголема стабилност, чекаме да го направат тоа оние што ги поставуваат барикадите или КФОР. Но, чекањето има свој крај“, рече Свечла.
Тој овие коментари ги даде на прес-конференција за медиуми во Митровица, велејќи дека условите на Србите, претставени за отстранување на барикадите, се за остварување на политички цели.
За апсењето на Пантиќ, вчера протестираа и Србите на северот, кои презентираа неколку барања за отстранување на барикадите, како ослободување на Дејан Пантиќ и Милан Адџиќ, повлекување на наводно „списокот“ за „апсење и пукање“ на Србите изготвен од косовските власти, како и повлекување на косовската полиција од северниот дел на земјата.
Услови за отстранување на барикадите постави и српскиот претседател Александар Вучиќ.
Вучиќ во средата изјави дека барикадите ќе бидат укинати само доколку се исполнат одредени услови, услови кои се во согласност со барањата на српската влада.
„Прво формирајте Заедница на српски општини, потоа ќе ги отстраниме барикадите“, рече Вучиќ.
КФОР, во соопштение за печат на 21 декември, рече дека употребата на насилство и агресивно однесување на северот за да се влијае врз политичките одлуки во Косово е неприфатливо и се смета за провокација, додавајќи дека одговорноста на сите е да ја гарантираат колективната безбедност на регионот.
Н. А
