Потпретседателот на Собранието Горан Мисовски по неколку часовна дискусија и политички обвинувања ја прекина денешната 104-та седница на која се дискутираше за предлогот за реконструкција на владиниот кабинет. Тој најави дека оваа седница ќе продолжи утре на пладне.
Вкупно 44 пратенци се јавија за збор. Според Деловникот нема ограничување колку дена може да трае дискусијата на темата реконструкција на владин кабинет.
Претпладнево на седница на Собранието беа констатирани оставките на сега веќе поранешните министрите за правда Никола Тупанчевски и за животна средина и просторно планирање Насер Нуредини, а во рамки на 104. седница останува да бидат разрешени тројцата министри од Алтернатива – за здравство Беким Сали, за информатичко општество и администрација Адмирим Алити и Џемаил Чупи, министер без ресор задолжен за дијаспора, кои најавија дека нема да присуствуваат на седницата.
Реконструкцијата на владиниот кабинет е за четворица министри и пет заменици министри, а следуваше по преговорите за приклучување на Алијансата за Албанците (АА) во владиното мнозинство.
За влезот во влада Алијанса за Албанците добива три министерства: Министерството за здравство, Министерството правда и Министерството за информатичко општество и администрација. Партијата исто така ќе ги добие заменичките министерски места за одбрана и за земјоделие, како и повеќе директорски позиции.
Претседателот на Демократски сојуз , Павле Трајанов вечерва на прес конференција најави дека неговата партија излегува од власта и ќе делува како опозиција.
Партијата на Трајанов соопшти дека и понатаму ќе иницира и поддржува реформи поврзани со евроинтеграциските процеси, со започнатиот скрининг процес, како и со законите кои се во интерес на граѓаните и на државата.
Инаку, вчера и Алтернатива ја напушти владината коалиција и соопшти дека ќе делува како опозиција.
