Сите сме потрошувачи, плаќаме ДДВ, ја полниме касата и од нас овие производители ги добија бенефициите. Ситуацијата со цените на пазарот е неиздржлива и државата мора да преземе итни мерки – вели претседателката на ОПМ, Маријана Лончар Велкова.
Бојкот за купување на одредени производи кои се енормно поскапени не е решение, сметаат од Организацијата на потрошувачи, особено кога се работи за основните прехранбени производи, како што е млекото. Тоа би ги загрозило децата кои во најранливата категорија и не би ја постигнало целта, вели претседателката Маријана Лончар Велкова.
Но, таа е ригорозна дека на компаниите кои ветија дека ќе ги намалат цените ако им се даде поевтина струја и не го сторија тоа, треба да им се земат парите и да се вратат во Буџетот. Лончар Велкова, стои на претходно искажаниот став дека замрзнатите маржи не ја постигнаа целта, а подобра солуција било плафонирањето на цените кое траеше до март 2022 година.
Претседателката на ОПМ, смета дека ако се слушаат најавите за падот на струјата, репроматеријалите и амбалажата, тогаш нема логика за нови поскапувања, иако производителите и трговците секогаш ќе најдат оправдување.
Владата навистина треба да размисли за да се заштитат граѓаните, треба да направи нешто посериозно. Јас лично се изненадив кога рекоа дека ќе престанат да им даваат субвенции на компаниите. Не треба да престанат, треба да побараат да им ги вратат парите за субвенционираната струја и ние тоа го бараме. Да побараат, тие пари што ги дале, да им се вратат назад, како што даваа субвенции за фирмите па не завршија кај работниците. Со тие средства може да субвенционираат да имаме „зелена енергија“, нека субвенционираат за луѓето да имаат помали сметки за струја. Ако сте се прашале колку субвенции даваат за тоа, ништо – „прв дојден, прв услужен“, значи нема енергетска ефикасност тука, а треба да се гледа и квалитетот на производот – рече Лончар Велкова.
Според неа, граѓаните трошат пари, плаќаат ДДВ и од нив производителите ги добија бенефициите.
Од ОПМ информираат дека секојдневно добиваат поплаки од граѓаните, можеби не конкретно за цените на храната или за сметките за струја, но се повеќе има револт од фактот дека една цена е на рафт, а друга на каса. Оосбено критики има за намалување на грамажата и тоа на пакуваните производи.
-Тоа е двојно поскапување. Едно е преку цената, а другото е со намалената грамажа. Тоа е огромен проблем, кој не е локален. Трговците и производителите не треба да се грижат само за профитот и постојано да наоѓаат оправдувањата за растот на цените. Замрзнување на маржите не е решение, подобро беше плафонирањето на цените, иако и тогаш имаше нефер трговска пракса, па преку ноќ исчезнаа одредени производи – додава Лончар Велкова.
