Европската комисија денеска почнува со регистрација на потребите за гас како подготовка за заеднички набавки на гас на ниво на ЕУ, соопшти Европската комисија.
Во тој процес, европските компании ќе можат да ги регистрираат своите потреби за набавка на гас преку механизмот АгрегатЕУ (AgeregateEU), а целта е да се подготви ЕУ за следната зима со навремено полнење на складиштата за гас.
Механизмот е отворен за компаниите кои трошат гас и оние кои тргуваат со овој извор на енергија од членки на ЕУ и земји од Енергетската заедница – Албанија, Босна и Херцеговина, Србија, Грузија, Косово, Црна Гора, Северна Македонија, Молдавија и Украина, се наведува во соопштението на Европската комисија.
Заедничкото купување, исто така, треба да донесе повеќе потпора во преговорите за цените со меѓународните добавувачи.
Компаниите што се пријавиле имаат рок од една недела, до 2 мај, да се јават на првиот повик. Откако ќе ги достават барањата, бараните количества ќе се соберат во еден агрегат за тендер на светскиот пазар.
АгрегатЕУ е новиот механизам на Унијата кој овозможува агрегација на побарувачката и заедничко купување гас на европско ниво. Тој е создаден по усвојувањето на Регулативата (ЕУ) 2022/2576 на Советот (т.н. „Регулатива за солидарност“) кој првпат воведе агрегација на побарувачката на гас на ниво на ЕУ и заедничка набавка.
Оваа легислатива беше предложена од Комисијата на 18 октомври 2022 година, договорена од министрите за енергетика на 24 ноември и формално усвоена на 19 декември минатата година, како дел од пакетот алатки на ЕУ за справување со енергетската криза.
Агрегацијата на побарувачката и заедничкото купување е еден од столбовите на работата на Енергетската платформа на ЕУ, која беше создадена за да работи на диверзификација на снабдувањето со гас од ЕУ откако Русија ја нападна Украина и Европа колективно одлучи да ја прекине својата зависност од увозот на фосилни горива од Русија.
Г. Т.
