Вчерашниот напад со беспилотни летала на украинскиот полуостров Крим, кој беше анектиран од Русија, е подготовка за планираната контраофанзива, соопшти денеска украинската армија, јавија странските медиуми.
Уништувањето на непријателската логистика е еден од подготвителните фактори за силните акции на нашите одбранбени сили, за кои зборуваме долго време, изјави Наталија Гумењук, портпаролка на јужната команда на украинската армија.
Гумењук додаде дека станува збор за подготовка за офанзива од големи размери „која сите ја чекаат“.
Голем руски магацин за гориво се запали по напад со дрон во пристанишниот град Севастопол на Крим вчера наутро. Според руските извештаи, нема повредени или жртви, а не биле оштетени ниту цивилни згради.
Украинското воено разузнавање соопшти дека се уништени десет цистерни со гориво. Кијив не ја презеде одговорноста за нападот, но разузнавачите соопштија дека таквите експлозии ќе продолжат.
Русија војува со својот сосед повеќе од една година и моментално контролира околу 20 отсто од територијата на Украина, вклучувајќи го и Крим, кој го анектираше во 2014 година.
Меѓународната заедница со недели чека најава за голема украинска офанзива. Украина сака, со помош на оружјето што и го испратија западните земји, да ги врати окупираните територии.
Г. Т.
