Американската крајбрежна стража предмалку одржа прес-конференција на која извести за текот на потрагата по исчезнатата подморница Титан. Капетанот Џејми Фредерик од Првиот округ на крајбрежната стража изјави дека „тимовите за потрага работат деноноќно“ и дека во спасувачката операција соработуваат американската крајбрежна стража, американската морнарица и Канада.
„Крајбрежната стража ја нема сета потребна експертиза и опрема, поради што повикавме други агенции и земји да помогнат, вклучително и морнарицата на САД и канадските вооружени сили, рече Фредерик.
Тој нагласи дека на подморницата и останале уште околу 40 часа воздух за дишење и дека крајбрежната стража на последната позната локација на подморницата започнала нуркање со далечински управувано пловило (ROV) со камера. „Ако ја лоцираме подморницата, експертите ќе го разгледаат најдобриот начин да ја вратат на површината“, додава тој.
Франција ќе испрати брод опремен со брод за длабинско нуркање со цел да помогне во операцијата за потрага и спасување на исчезнатата подморница, соопшти денеска француската Влада.
Голема спасувачка акција е во тек во Атлантикот, откако исчезна туристичка подморница со пет лица во неа и која требаше да се нурне до остатоците на потонатиот брод Титаник.
Контактот бил изгубен 1 час и 45 минути по нејзиното нуркање, соопшти американската крајбрежна стража. Операцијата се води од Бостон.
Помеѓу петмината патници во подморницата се наоѓа и богатиот британски бизнисмен Хамиш Хардинг, директор на компанијата Action Aviation, пренесуваат агенциите. Утрово беше објавено дека меѓу нив е и основачот на OceanGate, компанијата која е сопственик на подморницата.
На својата веб-страница OceanGate Expeditions наведува дека мисијата за посета на Титаник е во тек од 12 до 20 јуни.
Подморницата е дизајнирана да може да однесе пет луѓе на длабочина од 4.000 метри, а вкупно со пет луѓе може да остане под вода 96 часа.
Г. Т.
