Турските власти уапсија двајца вооружени напаѓачи осомничени за убиство на едно лице за време на неделната богослужба во Католичката црква во Истанбул, изјави турскиот министер за внатрешни работи Али Јерликаја.
Тој рече дека полицијата спровела повеќе од 30 рации и привела 47 лица во врска со нападот. Јерликаја изјави дека во нападот на италијанската католичка црква „Санта Марија“ бил убиен турски државјанин, кој бил цел на вооружени лица.
Јерликаја на платформата „Икс“ не го наведе мотивот на нападот и не откри кој го извршил нападот. Министерот рече дека двајцата напаѓачи носеле маски и биле присутни со верниците за време на неделната молитва.
Исламска држава ја презеде одговорноста за нападот преку објава на Телеграм, велејќи дека нападот бил одговор на повикот на лидерите на ИД да ги таргетираат Евреите и христијаните.
