„Ако пратиле, нека контролираат, не е направена ниедна грешка. Можат да извршат контрола над сите институции на Општина Гостивар“, реагираше денеска во изјавата за ЦИВИЛ Медиа, градоначалникот на Општина Гостивар, Невзат Бејта, по вчерашното влегување на Финансиската полиција во Општината. Тој ѝ порача на централната власт во Скопје да ја исконтролира својата работа и да одговори каде и како се потрошени милиони евра на граѓаните на Македонија.
Од Финансиската полиција за ТВ 21 изјавија дека во Гостивар биле за да проверат наводни нерегуларности за инфраструктурен проект на Општината во селото Тумчовиште кој чинел 80.000 евра. Проектот е пат којшто ги поврза селата Тумчовиште и Чегране, а на чие отворање Бејта и Никола Груевски заедно сечеа лента.
Во разговор за ЦИВИЛ Медиа градоначалникот Бејта потенцира дека Финансиската полиција е испратена со цел, врз него да се изврши притисок.
„Taa постапка е затворена. И сега, по мојата изјава, управата на Финансиската полиција испрати контрола во Општина Гостивар. Ако пратиле, нека контролираат, не е направена ниедна грешка. Можат да извршат контрола над сите институции на Општина Гостивар. Во изминатиот период сме работеле во согласност со законот, бидејќи знаеме дека сме Албанци, и нас Албанците нé контролираат, и кога прават големи грешки, за да ги сокријат своите грешки, тие ги обвинуваат Албанците. Тука нема кого да обвинат. Јас би им препорачал, тие да извршат контрола и за нивната работа во централната власт, каде отишле милионите, милионите евра на граѓаните на Република Македонија“, ни изјави Бејта.
Тој и претходно во медиумите изјави дека до првата ваква контрола во Општината доаѓа, откако потецирал дека „нема Албанец што сака коалиција со Груевски„. Како потпретседател на ДУИ, дава изјави за кои смета дека се важни за општеството. „Не прифаќам политички уцени“, беше дециден Бејта.
М. Ивановска
