Во раните утрински часови во неделата, 16 март, избувна пожар во ноќен клуб во Кочани, Северна Македонија, при што загинаа 59 лица, а беа повредени повеќе од 155. Веднаш потоа, Координативниот центар за одговор при итни случаи на ЕУ воспостави контакт со властите за цивилна заштита во Северна Македонија за да понуди солидарност и поддршка, објави Европската комисија.
Северна Македонија го активира Механизмот за цивилна заштита на ЕУ, барајќи помош за евакуација на 15 пациенти со тешки изгореници. Во брза реакција, 9 европски земји – Хрватска, Грција, Романија, Словенија, Шведска, Литванија, Унгарија, Луксембург и Норвешка – дадоа непосредни понуди за помош преку механизмот.
Веќе неколку пациенти се евакуирани во Унгарија од Луксембург, а Романија ги транспортира пациентите во Литванија. ЕУ сега го координира транспортот на дополнителни пациенти во земјите кои понудиле третман. ЕУ останува во близок контакт со националните власти во Северна Македонија и е подготвена да мобилизира поголема помош доколку е потребно.
Комесарот за подготвеност, управување со кризи и еднаквост, Хаџа Лахбиб, рече: „Изразуваме длабоко сочувство до семејствата на жртвите и сите засегнати. ЕУ стои во солидарност со народот на Северна Македонија во ова тешко време. Им благодарам на европските земји што брзо им понудија третман и помош на жртвите преку нашиот механизам за цивилна заштита“.
М. Д.
