Радислав Крстиќ, поранешниот командант на Дринскиот корпус на војската на Република Српска, кој Хашкиот суд го прогласи за виновен за геноцид на повеќе од 8.000 Бошњаци во Сребреница, прогон како злосторство против човештвото и убиство како кршење на законите и обичаите на војната, осуден на 35 години затвор, ќе продолжи да ја отслужува казната во Естонија, соопштија од Резидуалниот механизам за кривични судови, јавуваат регионалните медиуми.
Крстиќ беше уапсен на 2 декември 1998 година и пренесен во притвор во Хаг, беше осуден во април 2004 година, а во декември истата година беше префрлен во Обединетото Кралство на отслужување на затворската казна.
Во британски затвор, тој беше нападнат и ранет од затвореници, поради што во 2013 година беше префрлен во Полска, за да биде вратен во Хаг во ноември 2023 година, откако отслужи две третини од казната и Полска, според нејзиниот закон, ќе требало да го ослободи.
После тоа, владата на Естонија го извести хашкиот суд дека е подготвена да го преземе извршувањето на остатокот од казната, кој истекува на 23 ноември 2033 година, како што е објаснето во изјавата на Грациела Гати Сантана, претседателката на овој суд, кој е наследник на Меѓународниот кривичен трибунал за поранешна Југославија (ICTY).
Крстиќ е првиот човек осуден за геноцидот извршен во Сребреница во јули 1995 година.
Тој постојано бараше помилување и предвремено ослободување, но претседателот на судот Гати Сантана ги одби тие барања.
Во својата последна молба, тој ја призна одговорноста за геноцидот во Сребреница и, меѓу другото, изјави дека знаел дека „некои членови на Главниот штаб имаат намера да извршат геноцид“, но дека тој персонал „немал доволно сила да ги изврши стрелањата“ без „употреба на Дринскиот корпус“, со кој Крстиќ командувал во тоа време.
„Ако еден ден бидам ослободен и ако претседателот на Механизмот се согласи со тоа и ако тоа го дозволат семејствата на жртвите, би сакал уште еднаш во животот да бидам во Поточари, да се поклонам на сенките на жртвите и да побарам прошка“, напиша Крстиќ.
Крстиќ, кој сега има 76 години, побара да се земат предвид неговите сериозни здравствени проблеми, како што наведува во пријавата.
Тој изјави дека боледува од бројни хронични заболувања, дека трпи значителни болки поради оштетени крвни садови и атрофија по ампутацијата на ногата, дека боледува од анемија и висок холестерол и дека има сериозни проблеми со срцето.
„Сè уште не сум убедена дека тој покажа доволна рехабилитација“, изјави претседателката на хашкиот суд, Грасиела Гати Сантана, отфрлајќи го неговото барање за предвремено ослободување во февруари оваа година.
Силите на армијата на Република Српска убија повеќе од осум илјади бошњачки мажи и момчиња во Сребреница во јули 1995 година. Повеќе од 50 луѓе беа осудени на околу 700 години затвор за геноцид и други злосторства во регионот на Сребреница.
Меѓу другите, на доживотен затвор беа осудени воениот претседател на РС и врховен командант на Армијата на РС, Радован Караџиќ и Ратко Младиќ.
Д. Т.
