Основниот суд на Приштина, Специјалното одделение, соопшти дека денеска почна судењето за кривичниот предмет познат како „Бањска“ против тројца осомничени Владимир Толик, Благоје Спасојевиќ и Душан Максимовиќ, јавуваат косовските медиуми.
Судот упати и меѓународна покана до 42 други обвинети, кои се обвинети со Обвинението на Специјалното обвинителство на Република Косово, за да се обезбеди присуство на овие обвинети во постапката.
Одбраната побара од судијата на рочиштето да не присуствува истражителот Јетон Јетулаху, a обвинителот во случајот барањето на одбраната на обвинетите го оцени како неоправдано, но судијата Арбен Хоти го одобри предлогот на одбраната Јетулаху да ја ослободи судницата од причина штофазите на кривичната постапка се одвоени.
Во обвинението, Обвинителството наведува 34 досиеја со докази, меѓу кои видео снимки, анализи на електронски уреди, различни одговори од Луксембург, Босна и Херцеговина, банки и различни институции, изјави на сведоци итн.
Специјалното обвинителство на Косово, меѓу другото, ги товари обвинетите во случајот Бањска за терористички акти и дела против уставниот поредок и безбедноста на Косово.
Обвинителот во случајот, Наим Абази, претходно изјави дека обвинетите имале различни улоги во рамките на криминалната група, „од организирање и насочување на терористички активности, до финансирање и перење пари“.
Во обвинението се наведува дека оваа група преку употреба на насилство со тешко оружје се обидела „да го одвои северниот дел на територијата на Република Косово, поточно општините населени со српско мнозинство и да го припои овој дел од територијата кон Република Србија“.
На 24 септември 2023 година, српска вооружена група ја нападна косовската полиција во Бањска, при што беше убиен наредникот Африм Буњаку. Тројца напаѓачи биле убиени во размената на оган што следела.
Косово смета дека државата Србија е одговорна за организирање и извршување на нападот.
Одговорноста за нападот ја презеде поранешниот заменик-претседател на Српската листа, Милан Радоичиќ.
Тој во моментов се наоѓа во Србија, а против него е распишана меѓународна потерница од Меѓународната полициска организација (ИНТЕРПОЛ).
Д. Т.
