Косово ризикува да влезе во политички ќорсокак доколку избраните пратеници не успеат да го конституираат деветтиот законодавен дом на косовското Собрание до крајот на април. Имено, Косовското Собрание влегува во се подлабока институционална криза, откако вчера пропадна и вториот обид за конституирање на новиот законодавен дом, а се очекува третиот обид да се случи веќе утре ( 19 април), пишуваат косовските медиуми.
Во пресрет на изборите во Албанија ( 9 мај), Ревизијата на мнозинството политички партии регистрирани во Судот во Тирана пропадна бидејќи повеќето немаат точни адреси, а медиумите овие партии ги нарекоа „Фантомски“. Од 132 политички партии, 112 се со сериозни нерегуларности, што претставува своевиден скандал, пишуваат албаснките медиуми.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
КОСОВО
Бота сот: Собранието и по втор пат не успеа да се конституира, утре нов обид
Косовското Собрание влегува во се подлабока институционална криза, откако вчера пропадна и вториот обид за конституирање на новиот законодавен дом, пишува Бота сот.
Седницата која требаше да продолжи со гласање за извештајот на Комисијата за верификација на мандатите, воопшто не премина на гласање и покрај тоа што во салата беа присутни 100 пратеници.
Претседавачот со седницата Авни Дехари по консултации со претставниците на политичките партии одлучи да ја прекине седницата по втор пат, одложувајќи ја за сабота на 19 април. Прекинот го оправда со немање консензус меѓу политичките субјекти, а истовремено најави дека седницата ќе продолжи во рокот од 48 часа утврден со Деловникот на Собранието на Република Македонија.
Оваа одлука предизвика бурни реакции кај опозициските партии. Според нив, Дехари постапил спротивно на планираното сценарио на седницата, одбивајќи да го стави на гласање извештајот на Комисијата – дејствие кое според опозицијата било процедурална обврска.
Телеграфи: Може ли да дојде до политички застој доколку Собранието не се конституира во април?
Косово ризикува да влезе во политички ќорсокак доколку избраните пратеници не успеат да го конституираат деветтиот законодавен дом на косовското Собрание до крајот на април, вели вишиот истражувач на Косовскиот правен институт, Наим Јакај.
Јакај вели дека може да се повтори проблемот од 2014 година – периодот кога земјата влезе во политичка блокада цели 6 месеци.
„Конститутивната седница беше свикана на 15 април. И оваа беше свикана во уставниот рок, во рок од 30 дена од датумот на сертификација на парламентарните избори, што значи дека последниот датум кога Собранието би требало да го заокружи таков процес би бил 27 април.
Досега разумно е Собранието да се конституира и да го заврши процесот на конституирање, иако требаше да биде 15 април. Но, да го земеме за пример последниот датум, 30 април. По овој датум, Собранието на Косово влегува во политички ќорсокак кој не се знае како ќе заврши. „Неизгласувањето на извештајот на привремената комисија за проверка на кворумот и мандатите е непремостлив пат до доаѓање до заклетва на пратениците“, посочува Јакај, пренесе Телеграфи.
РТК – КЦЦС: Србија систематски всадува антизападен наратив и ја третира државноста на Косово како безбедносно прашање за да го оправда агресивното однесување
Во Извештајот од Косовскиот центар за безбедносни студии (КЦСС) се наведува дека доктрината за национална безбедност на Србија стана инструмент за институционализирање на непријателството кон Косово, а истовремено ја продлабочува стратешката соработка со Русија и Кина, развој што има потенцијал да ги поткопа интересите на ЕУ и НАТО на Западен Балкан, пренесе РТК.
Извештајот, насловен „Како српската безбедносна доктрина гледа на Косово, Западот, Русија и Кина?“, претставува анализа на Националната безбедносна стратегија на Србија усвоена во 2021 година.
Според наодите од извештајот, зад реториката за „воена неутралност“, Србија систематски всадува антизападен наратив и ја третира државноста на Косово како безбедносно прашање за да го оправда агресивното однесување.
АЛБАНИЈА
СУРИ: СПАК отвори истрага за вмешаност во изборен криминал во даночната администарција
СПАК ги прошири истрагите за вмешаност во изборен криминал и во високата даночна администрација.
Извори за ТВ Сури посочуваат дека високи функционери на Генералниот директорат за даноци се под истрага. Поточно, во истрагата се вклучени Клодијан Мема, директор на Антикорупциска, Блета Гуџа, директорка за човечки ресурси и Дијана Чаро, заменичка на Генерален директор за даноци и Шпреса Мезини директорка за размена на информации.
Панорама: „Фантомски“ политички партии; Ревизијата не успева кај повеќето, немаат точни адреси
Ревизијата на мнозинството политички партии регистрирани во Судот во Тирана пропадна бидејќи повеќето немаат точни адреси, пренесува Панорама.
Државниот изборен комесар назначи 12 лиценцирани сметководствени експерти за ревизија на 132 политички партии регистрирани во регистарот на Судскиот окружен суд во Тирана во врска со нивната активност во 2023 година.
Извештаите доставени од законските ревизори покажаа дека:
– 5 политички партии се заверени со резерва поради неправилности во пријавувањето на приходите и расходите, а во финансискиот извештај не ја прикажале вредноста на бруто платите на вработените како трошок;
– 81 политичка партија не е предмет на ревизија поради неточни адреси;
– 9 политички партии пријавуваат 0 приходи и расходи;
– 9 политички партии имаат пасивен статус;
– 6 политички партии не го доставиле својот годишен финансиски извештај до ЦИК и поради оваа причина ревизијата не беше спроведена од назначените ревизори;
– 2 политички партии не беа ревидирани, бидејќи не платиле за услугите на законските ревизори.
КОЛУМНА
Коха: „Стравот на Рама“
„Еди Рама сега се постави на пат кој има само две опции: или ќе биде премиер кој ја внесе Албанија во ЕУ и на тој начин ќе влезе во историјата, или самиот ќе стане небитна историја. Ништо помеѓу.
Несериозно е да се мисли дека Албанија може да постигне да ги заврши преговорите за членство во сите поглавја во рок од две години. Тоа значи дека во рок од две години Албанија ќе ги имплементира сите европски стандарди во сите поглавја на ЕУ.
Со други зборови, во рок од две години Албанија ќе се погрижи нејзините судови да функционираат на исто ниво како во Португалија, или дека нејзиниот образовен систем ќе биде еднаков со оној на Словенија. Со други зборови, Албанија во рок од две години ќе го направи она што и беа потребни шест години на Хрватска.
За да видите колку е ова невозможно, само погледнете го настапот на самата Албанија. Секоја година, Европската комисија објавува годишни извештаи во кои се оценува подготвеноста на Албанија да се приклучи на ЕУ во сите 33 поглавја. Од 2020 до 2024 година, Албанија не постигна напредок кон подобро подготвеност за членство во ЕУ во цели 21 поглавје. Следствено, идејата дека во рок од две години Албанија ќе ги исполни сите критериуми за членство во ЕУ е несериозна.“, пишува Авторот Демуш Шаша во колумната „Среавот на Рама“, објавена во косовскиот дневник Коха.
Подготви: Д. Тахири
