Стратешкиот договор меѓу Северна Македонија и Велика Британија е за пријателство, економски раст и соработка во повеќе области, градење мигрантски кампови „ниту му паднало на памет ниту било побарано“, а тоа јасно го кажал и британскиот амбасадор во државава, вели лидерот на ВМРО-ДПМНЕ и премиер, Христијан Мицкоски, на годишната конференција на УЖ на ВМРО-ДПМНЕ.
„Овој договор е мојот нов договор за Македонија по примерот на оној кој го обзнани американскиот претседател Рузвелт и кој е познат во историјата. Овој договор значи отворање на работни места, развој, напредок, многу нови инфраструктурни проекти, многу големи гигантски проекти какви што досега немало, инвестиции во железници преку брзи линии, автопатишта, болници, образование и други сектори. Ова е договор кој на Македонија ќе и донесе пари за да работи и инвестира во својот напредок во вредност од шест милијарди евра“, порача Мицкоски.
Петиција и референдум против населување на мигранти во 2017 година
Во август 2017 година, ВМРО-ДПМНЕ за време на предизборната кампања ширеа дезинформации и исламофобија и ги заплашуваа граѓаните дури и дека ќе треба сунет да се прават ако се населат илјадници мигранти со исламска вероисповед. За „спречување“ на исламизација и против изградба на мигрантски кампови преку иницијативата „Будење“ се собираа потписи и се организираа референдуми.
ВМРО-ДПМНЕ тогаш бараа референдум:
„(Премиерот) Зоран Заев и (министерката за труд и социјала) Мила Царовска наместо да се кријат зад бледи соопштенија и да ги блокираат референдумите за изјаснување за трајното населување на 150.000 мигранти кои ги иницираа граѓаните, храбро да излезат и да соопштат зошто преку државниот инспекторат за локална самоуправа кој е владина институција го забранија оваа демократско право на граѓаните. Доколку СДС мислат дека трајно населување на мигранти е исправна владина одлука и стратегија, зошто не дозволија на граѓаните преку референдум, кој ќе биде организиран заедно со локалните избори, на еден трошок, да кажат што мислат за ваквото погубно решение на владата“.
Или што би рекол тогашниот градоначалник на Карпош, Стевчо Јакимовски – „САД и Русија нека ги примат мигрантите, а не Македонија“.
Повторно параноја од „изградба“ на мигрантски кампови
Денес, мај 2025 година, повторно се отвара прашањето за населување на мигранти. Повторно се шири исламофобија и расизам.
„Големо НЕ за населување на муслимански мигранти во Македонија! Не за промена на етничкиот и религиозниот состав на државата! Македонија не е депонија за цел џган да се транспортира во Македонија! Не сакаме муслимани, црнци и индијци да ја населат нашата татковина, муслимани кој еден ден ќе станат доминантно население! Со секое населување на муслимани се ништо македонскиот карактер на државата, бидејќи тоа исламско население ќе се асимилира во Албанци!
НЕ за муслиманска Македонија! НЕ за црнечка Македонија! Македонија на Македонците!“, стои во Фејсбук објавата на Млади за Македонија.
Во друга објава на Фејсбук страницата Млади за Мкаедонија пишува: „Доколку се почне со изградба на мигрантски кампови, ќе почнеме постапка за собирање на 150.000 потписи за референдум“.
И што би се рекло народно – „се е исто како во 2017, само ВМРО-ДПМНЕ го нема“. Тогашната опозиција ВМРО -ДПМНЕ заплашуваше народ и правеше хистерија и гнев против СДСМ, денес, 8 години подоцна, нема ниту еден мигрантски камп, а може на прсти да се бројат колку мигранти има на територија на Северна Македонија! Никој не одговараше ни кривично ни морално за лажењето дека ќе се доселат „стотици илјади до милион мигранти“…
Дехран Муратов
