Министерот за внатрешни работи Панче Тошковски е фатен жив во огромна корупциска шема. Откако вчера јавно призна дека МВР доделило тендер вреден 4 милиони евра и на фирма основана само 20 дена пред распишување на тендерот се скри и не одговори на клучните прашања кои ги поставивме, велат од СДСМ.
Од опозициската партија велат наместо да се крие и да се претставува како борец за правда, да излезе и да одговори веднаш.
„Како е можно фирма што дотогаш не постоела, да ги исполни сите услови и да достави мостри за квалитет? Кој ѝ ги кажал условите однапред? Кој ја подготвил да учествува и да победи? Каде се тие мостри што ги доставила, кога фирмата не ни постоела?
Тошковски вели дека се водел по „квалитетот“ на понудата. Како тоа се дефинира квалитет кај фирма без искуство, капацитет и историја на работење? Или квалитетот се квалитетни врски и провизии за Тошковски и ДПМНЕ?“, прашуваат од СДСМ.
СДСМ бара, итна постапка од Јавното обвинителство, распит на сите вклучени во тендерот, испитување на можни кривични дела: злоупотреба на службена положба, местење тендер и перење пари и поништување на целиот тендер.
Министерот за внатрешни работи, Панче Тошковски, го повтори ставот дека тендерската постапка за набавка на униформи за полицијата, е согласно законот. Тој демантираше дека сопственичката на модното студио, за кое опозициската СДСМ обвини дека е основано непосредно пред распишување на тендерот и е со двајца вработени, е пријателка на неговата сопруга.
„Ниту знам кој е сопственик на модното студио кое и да е, ниту пак било кој и да е сопственик е близок на мојата сопруга. Од ова прашање, ќе сфати јавноста дека ова е хајка“, вели Тошковски.
Тој посочи дека досега не се сеќава дека во Македонија има политичар кој е проверуван како работи уште пред да ја добие функцијата.
„Во текот на вчерашниот ден, даден е одговор на сите обвинувања. Сметам дека МВР тоа што требало да го преземе, го презело. Одредени услови кои се побарани – согласно информациите кои ги имам, а се поврзани со квалитетот на униформите – се исполнети. Досега не е нарачана ниту една униформа. Да оставиме да видиме како ќе се одвива овој процес“, рече Тошковски.
На крајот, тој ги повика институциите да го испитаат тендерот.
„Ги повикувам одделите при МВР и Обвинителството да ги истражат сите тендери кај што има сомнежи. Јас преземам сѐ што треба да преземам, се грижам за имплементирање на проектите“, рече Тошковски
Во врска со тендерската постапка, министерот појаснува дека не е склучен договор за еднократна исплата, туку рамковна спогодба за период од три години, што не создава финансиска обврска туку овозможува склучување поединечни договори кога ќе се јави реална потреба.
„Разликата е клучна – не се исплаќаат средства однапред, туку само по реална нарачка и испорака, со посебен договор и обезбедена банкарска гаранција од 5%“, истакна министерот.
Тошковски реагира и на критиките поврзани со наводниот недостиг на критериуми за искуство и број на вработени кај фирмите понудувачи:
„Наша цел беше поттикнување конкуренција и добивање најдобар квалитет по најповолна цена. Премногу строги критериуми ги исклучуваат домашните мали и средни претпријатија, а тие често се најконкурентни. Законот не дозволува дискриминација врз основа на старост на фирмата, а ние постапуваме исклучиво според закон“, нагласува Тошковски.
Како клучна гаранција за квалитет, според министерот, биле задолжителните мостри и лабораториски анализи. Секој понудувач морал да достави примероци кои биле тестирани од акредитирани независни лаборатории, врз основа на јавни технички спецификации утврдени со Правилник објавен во Службен весник.
„Тендерот беше транспарентен – го продолживме рокот за понуди од 32 на 55 дена, а постапката беше предмет на контрола од Бирото за јавни набавки, кое не утврди никакви неправилности“, потенцира Тошковски.
Д.М.
