Фонтана за која се потрошени 150.000 евра – без довод и одвод, фудбалски терен кој неофицијално чинел – 100.000 евра, а на кој сé уште не е одржан ниту еден тренинг или натпревар, се само дел од нефункционалните објекти од инфраструктурната програма која се спроведува изминатите години во Свети Николе. Никој не спомнува отчет и одговорност.
Фудбалскиот терен остана празен, раскопан и обраснат со трева.
Уште поневеројатна е приказната за фонтаната за која беа потрошени 150.000 евра од граѓаните на една мала општина, а која денес е резил за светиниколчан(к)и и за сите посетители.
Прекрасната фонтана работела само кус период пред неколку години, и оттогаш, наместо со вода, е полна со отпадоци.
Светиниколскиот градски парк со цвеќиња и зеленило се претвори во парк на нефунционална фонтана без одвод, која по секој дожд или стопен снег се празни со пластични канти и кофи!
Со години наназад, грдата слика на фонтаната и на паркот се најдобра илустрација за неисполнетите предизборни ветувања на претходниот градоначалник и за неможноста на актуелниот да ја поправи грешката на негоиот сопартиец.
Христина Панева
