Источна Македонија веќе десетина дена е зафатена со повеќе протести на работници, претежно од текстилната и кожарската индустрија. Иако постојано се соочуваат со притисоци, тие овој пат решија да се борат до крај.
Покрај штрајкот на работниците од „Кадоро ОТО“ од Крива Паланка, кои пред десетина дена излегоа на штрајк поради две неисплатени плати и придонеси, од вчера, штрајкуваат и 250 работници од текстилната фабрика „Трико Зона“ од Виница, кои безизлезно си ги бараат заостанатите осум плати!
Овие граѓани упатуваат апел до надлежните институции да излезат на терен и да ги проверат состојбите и условите за работа.
А Културно уметничкиот центар „Текстил“, каде е сместена канцеларијата на Здружението на граѓани на текстилни и кожарски работници „Тивкото мнозинство – Гласно!“ , минатата недела повторно беше мета на вандали кои направија материјална штета.
„Но, борбата за човекови и работнички права и слободата на здружување и изразување на граѓаните, нема да застане овде“, порачуваат од организацијата која ги подржува работниците/работничките од текстилната и кожарската индустрија во борбата за нивните права .
Во денешното соопштение тие истакнуваат дека и понатаму ќе бидат на страната на работниците во Македонија и го најавија новиот проект „Правно зајакнување на текстилните работнички за самозастапување“ што ќе го имплементира Хелсиншкиот комитет за човекови права на Република Македонија, а е поддржан од Фондацијата Отворено општество Македонија.
