ОЛИВЕР АНДОНОВ
За заштитата и спасувањето
Заштитата и спасувањето претставува потсистем на системот за безбедност и одбрана. Иако е потсистем, тој е исклучително значаен бидејќи функционира и во војна и во мир, затоа што ризиците и заканите од несреќи и катастрофи не се поврзани исклучиво со воени загрозувања и истите може да бидат предизвикани од природни несреќи и техничко-технолошки акциденти. Тоа значи дека Дирекцијата за Заштита и Спасување (ДЗС) мора да биде опремена и обучена за справување со сите видови на несреќи и катастрофи. Но тоа значи и дека ДЗС има обврска за планирање на заштитата и спасувањето, како и спроведувањето на мерките на заштита и спасување и на мерките за евакуација и спасување на загрозено население.
Во тој контекст, самата ДЗС не е админстративно-управен орган, иако мора да врши контрола и надзор на предвидените и спроведените мерки за заштита и спасување. ДЗС е оперативен орган, надлежна и за обука не само на своите активни и резервни единици, туку и на населението за постапки при разни видови на загрозување, како и одржување на системите и ресурсите за заштита на населението и спроведување на евакуацијата. Овде, правејќи една контекстуална забелешка, забележуваме дека другарот СтојанЧЕ, ова го разбрал токму како што треба. Па така, наместо набавка на набљудувачки дронови, како против пожарна превенција, предлага пиво пред кооперација и гледање во планината. Ете тоа е кога некому му тежи умот и мисли дека е паметен, па згора и ни ја навредуваат интелигенцијата. Бог да чува. А ова со гајбата пред кооперација го објаснуваше и Мицкоски, па така, не се чудете, особено вие драги мој сопартијци, зошто Мицкоски го направи нашето ВМРО-ДПМНЕ канта за смет на политичкото ѓубре во Македонија.
Секако, заштитата и спасувањето како и самите ризици и закани не се однесуваат исклучиво на загрозувањето на населението, туку и на животните (стоката, што би рекол Мицкоски – онаа противпожарната) како и на растенијата и објектите, особено критичната инфраструктура. За да може ова да се реализира, ДЗС има главна оперативна улога во планирањето и реализацијата на сите активности, било да се работи за организациско-формациска структура на единиците и штабовите за заштита и спасување (тоа не е задача на Мицкоски иноваторот, па да прави кризен штаб во владата, за ПР секако, во реалноста постои Управувачки Комитет и за негово организирање и свикување задолжен е ЦУК), било да се работи за плановите за реализација на обуките, било да е во прашање системот за мобилизација на резервниот состав на единиците на ДЗС или да се работи за опремување на единиците со соодветни средства и опрема за заштита и спасување, која најчесто е под назнаката „специјална опрема“. Па така и возилата иноватори мои, се во делот „специјални возила“ за противпожарна заштита, а не пренаменети борбени возила.
Цела година наназад се обидувате со ликови кои врска немаат за тоа што значи заштита и спасување (всушност, тоа се случува во секоја област во општеството), божем да ја реорганизирате работата на ДЗС и ЦУК. Дури и Мицкоски донесе некои професори од Аризона, САД, кои утврдија дека нашиот систем не е ист како оној во САД (good morning, Columbus), па така никогаш не дознавме колку пари нѐ чинеше нас даночните обврзници оваа авантура на Мицкоски. Потоа формираше координативно тело на чело со Љупчо Димовски кој, пак, иако министер, всушност врска си нема човекот од оваа област. Потоа го преместија Стојанче во ДЗС, а тој глуми генерал, постројува, престројува (а верувам дека и овие војнички термини од строева обука не ги знае) пожарникари, па започна да се занимава со иновации. И така, славните иноватори измислија дека треба старите БТР-ови како оклопни борбени возила да ги пренаменат во противпожарни специјални возила. А Македонија гори.
Е па драги мој дудуци – иноватори, дали можеби сте забележале дека БТР-от на шасијата (тоа е оној корпусот на кој лежи телото на транспортерот) има четири осовини кои имаат своја носивост и стабилност, бидејќи самиот транспортер е на тркала. На самото тело на транспортерот се наоѓа мала купола. Е таа купола е таква, не само заради борбените и тактичките особини на транспортерот, туку и за да се постигне стабилност на истиот. Токму на местото на таа купола вие како генијалци иноватори монтиравте цистерна за вода која е повисока од корпусот на самиот транспортер. Тоа значи дека самиот транспортер нема да биде стабилен при нерамен терен особено при ангажман за гасење на шумски пожари на терен со косини особено странични. Друго прашање е потрошувачката на гориво. За БТР-70 тоа се V-8 два бензински мотори кои трошат ужасно многу, а потоа е прашање за техничко одржување на овие возила кое е многу проблематично. Тоа можевме да го видиме веќе ден по нивната промоција на Пепелиште, како мора еден од БТР-ите да се шлепува. Исто е и со Хермелините. Моето искуство од употребата на Хермелините во 2001 година и тоа за нивната основна борбена намена е дека возилото воопшто не е погодно да се употребува на планински терен и дека е многу нестабилно при совладување на странични косини. Се нзнамачивме влечејќи ги со Леонидасите и да не ги задржуваа дрвата покрај шумските патишта, веројатно ќе завршеа во некој дол на Скопска Црна гора. И сега вие сакате да ги употребите во гасење на шумски пожари и уште да влечат цистерна од три тони. Бравос бе, генијалци иноватори.
Не знам дали сте слушнале дека светот отиде напред и дека за гасење пожари на отворено, особено на шумско-планински терен и недостапни терени се користат дронови, а не кооперации како набљудувачки станици. Втора иноваторска работа се будалаштините кои ги правите за да го зголемите бројот на пожарникари, но исклучиво и само како предизборен маркетинг за „можно вработување“. Всушност, продавате надеж за четиристотини евра. Колку е сиромашен македонскиот граѓанин кого за времени четиристотини евра ќе го ангажирате во пожарникари. Секако, без соодветна обука и вклучување во формациска структура на ДЗС, бидејќи ја немате. Како што немате ниту структура на штабови на ДЗС, а не пак соодветна обука на овие луѓе за да може правилно да ја употребат и таа малку опрема која ја имаме и, пред сѐ, да се заштитат себеси. Сосема друга работа е навремена и соодветна противпожарна и секаква друга превенција од ризици и закани. За тоа не сте слушнале – „генерали“ – а не пак да знаете, или да имате идеја како тоа се прави.
Во Македонија и во самата ДЗС постојат луѓе кои знаат што е тоа заштита и спасување и во тие рамки што значи противпожарна заштита во објекти, во населени места и на отворено, само треба да ги прашате и да сакате соодветно, без да крадете, да ги користите парите на граѓаните.
Целиот потсистем бара потполна реорганизација и соодветна организација и формација на единиците и штабовите што бара сериозен пристап, работа и средства, а не „иноваторски“ импровизации. Откако ќе ги видиме не-резултатите, многу ме интересира кој иноватор-генијалец што ја дал идејата – ќе одговара. И секако, доколку БТР-ите ги дадевте како донација за вооружување на Украина која соодветно ќе ги употребеше за одбрана на својата земја од руската агресија (нема да ви објаснувам како ќе ги употребеа, тоа за вас иноватори е висока математика), ќе можевме да побараме од НАТО и ЕУ надомест во современи против пожарни возила и друга опрема во рамки на цивилните капацитети. Но кај вас во политичката замисла која не е наша автохтона, македонска – туку очигледно обврзувачки ви е наметната и проруска – такво нешто не постои. Вие за инает нема да ѝ помагате на Украина и ќе објаснувате како БТР-овите и Хермелините ни требаат. А ние упатените, добро знаеме дека овие возила се надвор од оперативна употреба како не-перспективни, застарени и тешки за одржување. И секако дека се, кога БТР-70 се стари повеќе од 50 години а БТР-80 повеќе од 30 години.
За политиката ПУ, ПУ – НЕ ВАЖИ
И кажа Мицкоски и порекна, како вообичаено (да не кажеме излажа). Како Бранче во најдобрите времиња на државник. Се гледа менторот оддалеку, како и по коалиционите му партнери и СДС умрено кое само флоскули реди колку нешто да каже. Очигледно дека ние од Внатрепартиската фракција сме поголеми критичари на погрешните политики кои Мицкоски ги спроведува во името на нашата партија ВМРО-ДПМНЕ.
Те сме 4-та економија во светот, ама не може да се справи со инфлацијата од над 11% која ги вивна цените на прехранбените продукти во небо. Те ќе градиме брзи пруги, а никако да започнеме. Те француски компании во мај требаше да започнат со инвестиции во здравството во Македонија, а мај мина, сега сме половина на Јули. Те ЕУ е фашистичка организација која заедно со Бугарија, талибански ни го одзема нашиот многувековен јазик и идентитет, а не се прашува како ние го чуваме македонскиот идентитет и јазик. Те ќе оданочува за неженети-немажени, те не е така, туку сакал да развие дебата за зголемување на стапката на фертилитет и пораст на демографијата.
Аман више, одамна ти рековме да молчиш, да не нѐ браниш, и да се фатиш барем за една работа, еден проект сериозно да го сработиш.
И престани да шириш анти-ЕУ расположение кај македонските граѓани и да ја правиш Македонија недоверлив член на НАТО. Ете, ги кажа градоначалниците, ти одлучи кого ќе кандидираш и тоа според твојот роднинско-лојалистичко-пријателски мерит систем и немој да заборавиш дека ти ја носиш одговорноста за тоа што ќе се случува на локалните избори. Знаеме дека ќе се обидеш да си играш весела математика за тоа колку градоначалници или колку советнички места ќе освои нашата партија, односно ти. Но немој да заборавиш дека твоите погрешни политики ќе принудат многумина од нашите сопартијци, а уште повеќе од симпатизерите, да не излезат на избори. Во исто време СДС умрено не е конкурент со кој треба да се мериш. Тие, според договорот кој го имаш направено со Заев ќе ти послужат само како боксерска вреќа, спаринг партнер, глумци во претставата за божем демократија. Вистинскиот противник кој твоите политики ќе го имаат на локалните избори ќе бидат граѓаните на Македонија. Токму преку нивната излезност и бројот на гласови кои ќе ги добие нашата партија и тоа исклучиво на советничките листи, ќе бидат тестирани твоите катастрофални политики. Што правиме, Христијане, доколку паднеш за сто и повеќе илјади гласови во однос на парламентарните избори?
На претстојните локални избори знаеме дека ќе се обидеш да наметнеш теми за наводно загрозениот македонски јазик и македонски идентитет кои ти ги браниш. Секако, збор нема да кажеш за забелешките за потполната окупација на Македонија од рускиот и српскиот свет. Но во рамките на гол ПР ќе сакаш да зборуваш за божем социјалната политика и пензионерите, божем изградбата на автопатишта и слични небулози. Се надевам дека македонските граѓани нема да наседнат на овие глупави теми, туку дека ќе те прашаат најдиректно за локалните проблеми, а посебно за тоа што реализираа твоите градоначалници во нивниот полн мандат од четири години. И повторно, немој да раскажуваш приказни за тоа како не можеле да работат под власта на неспособниот Ковачевски, бидејќи ти прво што направи – им даде 250 милиони евра на општините од унгарскиот кредит, а ние како граѓани ништо не видовме од тие пари. Никакви значајни инфраструктурни проекти не направи, се задушивме во смет, во неискосени јавни површини кои, за волја на вистината, не се обврска на град Скопје, туку токму на локалната самоуправа во општините.
Затоа, во текот на изборите, најотворено и најјасно ќе зборуваме и како внатрепартиска фракција – ќе те прашуваме и тебе и твоите кандидати за градоначалници за тоа што конкретно реализиравте во изминатиот мандат и што тоа конкретно планирате да направите. Само нема да поминат лагите со ЌЕ, или 1198 проекти од парламентарните избори од кои за една година ништо не реализира твојата влада. Влада која е подготвена за ремонт во скоро сите ресори. И кога сме кај владата, кажи им на твоите министри дека се должни да одговараат на барањата и дописите на граѓаните, а не да ги игнорираат, глумејќи „молк на администрацијата“, а не знаат ниту што значи тоа, ниту пак кога се применува.
Сериозна анализа на извештајот од ЕП за напредокот на Македонија во оваа колумна нема да има. Не дека како Внатрепартиска фракција немаме свој автохтон став, туку затоа што гледајќи ја патетиката на Мицкоски за постојаната неправда врз нас Македонците и споредувајќи ја со фактот дека токму тој непотребно го отвори затворениот процес од пред скоро еден век, сега ќе ни прави национална општествена траума во која ќе ја обвинува Европа и секого друг.
Прашањето на кое другарот ПУ, ПУ, НЕ ВАЖИ треба да одговори е: „Каде е личната одговорност за неуспешната твоја, божем борба за Македонија, и дали ќе се повлечеш од сите твои политички и државни функции како резултат токму на твојот политички неуспех од национални размери кој продолжено ќе влијае ужасно врз нашата татковина Македонија“?
Мицкоски нѐ воведува во отворени непријателски односи со Бугарија, а всушност со ЕУ (бидејќи ЕУ е нели фашистичка и талибанска). Таквиот однос ќе предизвика Македонија да избледи од заедничката европска слика на народи, нации и држави. И за тоа ти Ви зборував драги мои, дека одиме по патот да бидеме само фуснота во европската историја.
Она што ми прави „дилема“ во односот на Мицкоски кон прашањето за уставни измени е неговата изјава дека: „Не е проблем уште утре да ги внесеме Бугарите во устав“. Дали тоа значи дека веќе си се согласил за уставни промени, дека си притиснат до ѕид поради не знам што, па сега плачеш јавно за на нацијата да ѝ креваш јадови? Или откако виде дека ја утна работата и самиот ти го загрози македонскиот јазик и идентитет утврдени и затворени пред 80 години, сега се обидуваш да се оправдаш пред граѓаните со празни говори, а сѐ ќе си направиш како попче. Твој проблем е како сега твоите грешки од национален маштаб ќе ги оправдаш пред партиското членство кое го лажеше дека си „шајка“ со Вајц и дека си голем политичар и играч гарантирајќи им десет години власт на чело со тебе. Ти го урнисуваш нашето ВМРО-ДПМНЕ и тоа со твоите политички иновации кои се, всушност, само едноставни импровизации на група неграмотни на чело со еден супер неграмотен. Дека си издувана и потрошена и тоа бофл стока е видливо преку тоа што никој од медиумите на твоето обраќање не ти постави ниту прашање. Иако на пресот на кој како премиер и се обраќаше на нацијата, а се обрати од нашето партиски седиште немаше физичко присуство на новинари. А тие, медиумите, ниту потоа не сакаа да те прашаат било што. На сите им е сѐ јасно околу тебе. Како што ти кажав. Го потроши мандатот на ВМРО-ДПМНЕ со брзина на светлината во само една година. Се радикализираш надвор од современите текови и се обидуваш нацијата да ја радикализираш. И верувам дека си многу свесен за последиците кои ги предизвикуваш врз нашата татковина Македонија.
Проблемот за нас Мицкоски си ти и тоа што ти со твоите политички иновации како политички дустабанлија нѐ доведе во ќорсокак како и секој одличен локален политикант.
Текстот е личен став на Авторот.
