Повеќе од 1.000 Палестинци се убиени од израелските сили од мај додека се обидувале да добијат храна во Појасот Газа, претежно во близина на хуманитарни локации управувани од американски изведувач, соопшти во вторник канцеларијата на ОН за човекови права, пренесе Асошиетед прес.
Во меѓувреме, израелските напади убија 25 лица низ Газа, според локалните здравствени службеници.
Очајот расте на палестинската територија со повеќе од 2 милиони жители, за која експертите велат дека е во опасност од глад поради израелската блокада и речиси двегодишната офанзива. Распаѓањето на законот и редот доведе до широко распространети грабежи и придонесе за хаос и насилство околу испораката на помош.
Министерството за здравство во Газа, кое е дел од владата предводена од Хамас и е составено од медицински професионалци, соопшти во вторникот дека 101 лице, вклучувајќи 80 деца, починале во последните денови од глад.
Од Светската програма за храна на ОН велат дека кризата со глад во Газа достигнала „нови и зачудувачки нивоа на очај“. Рос Смит, директор на агенцијата за вонредни состојби, им изјави на новинарите во понеделник дека речиси 100.000 жени и деца страдаат од тешка акутна неухранетост, а една третина од населението на Газа е без храна неколку дена по ред, пишува АП.
МедГлобал, добротворна организација што работи во Газа, соопшти дека пет деца на возраст од само 3 месеци починале од глад во последните три дена.
„Ова е намерна и предизвикана од човекот катастрофа“, рече Џозеф Беливо, нејзин извршен директор. „Тие деца починаа затоа што нема доволно храна во Газа и нема доволно лекови, вклучувајќи интравенски течности и терапевтска формула, за да ги оживеат.“
Хобротворната организација соопшти дека храната е толку дефицитарна што нејзините вработени страдаат од вртоглавица и главоболки.
Израел го обвинува Хамас за одземање на помошта – без да обезбеди докази за широко распространето пренасочување – и ги обвинува агенциите на ОН за тоа што не успеале да достават храна што ја дозволиле. Војската вели дека испукала само предупредувачки истрели во близина на местата за помош. Хуманитарната фондација Газа, американски изведувач поддржан од Израел, ги отфрли она што го нарече „лажна и претерана статистика“ од Обединетите нации.
Д. Т.
