„Ич – народски кажано!“: Граѓаните незадоволни од транспарентноста на власта и институциите
Прашањето на денот кое го поставивме – „Колку власта и институциите се транспарентни и достапни?“ – предизвика бурни реакции кај граѓаните. Одговорите се речиси едногласни: недостиг од транспарентност, одговорност и достапност.
„Ич – народски кажано!“, гласи еден од коментарите кој накусо го сумира општото расположение. Мнозинството коментари се исполнети со цинизам, разочараност и критики на адреса на институциите – и актуелните и поранешните.
„Ниту слушаат, ниту реагираат. Пред вас климаат со глава, но реално ништо не е ниту транспарентно, ниту доследно.“
Овој став го делат многумина, кои велат дека контакт со институциите е речиси невозможен, дури и кога станува збор за најосновни барања:
„На обичен телефонски повик никој не одговара, на прашања на меил никој не одговара… па ќе зборуваме за транспарентност?!“
Граѓаните не гледаат разлика ни меѓу сегашната и претходните власти – за нив, недостапноста и игноранцијата се континуитет:
„Потполно исто – и актуелните и претходните. Колку што сакаат тие што одлучуваат за тоа.“
Најострите критики доаѓаат на сметка на политичката култура во земјава, каде, како што велат граѓаните, институциите исчезнуваат веднаш по изборите:
„За време на избори… А после ги нема. Многу се заузети во профитирање и лажење.“
Еден корисник го опишува степенот на транспарентност со една кратка формула:
„Негативна нула“
додека друг додава:
„10% максимум“ – што, иронично или реално, сугерира дека некоја форма на достапност постои, но е недоволна.
Овие реакции се јасен показател на загубената доверба во институциите. Отсуството на одговорност, затвореноста кон јавноста и недостигот на комуникација оставаат простор за револт, и – уште полошо – апатија.
Прашањето останува отворено:
Ќе ја чујат ли институциите пораката на граѓаните?
A.M.
