Доналд Трамп изјави дека распоредил нуклеарни подморници во „соодветните региони“ како одговор на заканувачкиот твит на поранешниот руски претседател Дмитриј Медведев, во кој сугерираше дека би бил подготвен да започне нуклеарен напад додека тензиите растат поради војната во Украина, пренесе Гардијан.
Во објава на Truth Social во петокот, Трамп напиша дека одлучил да ги препозиционира нуклеарните подморници поради „многу провокативните изјави“ на Медведев, истакнувајќи дека сега е заменик-претседател на рускиот совет за безбедност.
Медведев претходно изјави дека заканите на Трамп за санкционирање на Русија и неодамнешниот ултиматум се „закана и чекор кон војна“.
„Наредив две нуклеарни подморници да бидат позиционирани во соодветните региони, за секој случај ако овие глупави и провокативни изјави се повеќе од тоа“, одговори Трамп. „Зборовите се многу важни и често можат да доведат до ненамерни последици, се надевам дека ова нема да биде еден од тие случаи.“, пишува Гардијан.
Тој не прецизираше дали се однесува на подморници со нуклеарен погон или со нуклеарно оружје.
На прашањето подоцна од новинарите зошто наредил движење на подморниците, Трамп рече: „Заканата беше упатена од поранешен претседател на Русија и ние ќе го заштитиме нашиот народ“.
