Ова прашање што го постави ЦИВИЛ на својата Фејсбук страница предизвика бура од реакции, гнев и разочараност кај граѓаните – без разлика на нивната етничка припадност или политичка определба.
„Кога скандираат ‘Чиста, чиста Македонија’ мислев дека се еколошки друштва. Тие да ти биле ВМРОвци!“, вели еден граѓанин, иронично коментирајќи за скандирањата што се слушнаа на натпреварот меѓу Македонија и Романија, при што се пееја антиалбански и неонацистички пароли.
Нема подолу од ова
Голем број коментари го осудуваат говорот на омраза, барајќи итна примена на членот 319 од Кривичниот законик – што предвидува казни за ширење расна и верска омраза.
„Е друг пат ќе се мислат! Неспроведувањето ќе значи државна поддршка на наци-фашистичката идеологија!“, пишува еден од коментаторите.
Казна за сите – без разлика на националност
Многумина бараат нулта толеранција – и за поединците и за клубовите:
„Тие што го прават ова, било Македонци или Албанци, веднаш во затвор! А клубот што е организатор – доживотно да му се забрани да организира што било, во спорт или каде било!“
Политика зад трибините?
Неколку граѓани директно ја обвинуваат власта и опозицијата дека стојат зад ваквите инциденти:
„Ништо не е случајно. Сѐ е однапред смислено и нарачано“, „Провокациите се само продолжена рака на национализмите во одредени партиски кругови. Целта? Да се прикрие криминалот“, пишуваат тие.
Некои не се воздржуваат ниту од директни политички обвинувања:
„Премиерот Христијан Мицкоски само лицемерно го осуди инцидентот… по диктат на Вучиќ. Се подготвува хаос за избори, заедно со Орбан и Путин“.
Доволно беше
Голем дел од реакциите укажуваат на морална деградација и недостаток на институционален одговор:
„Многу внимание им обрнувате на хулиганите. Тоа е талогот на општеството!“, вели еден коментатор.
„Кога мултиетничкото функционира само на хартија, резултатот е евидентен“, додава друг.
Еден предлог што се повторуваше неколкупати е дека секој обид за ширење омраза треба веднаш да се санкционира и – натпреварот да се прекине:
„Зошто да не се стави правило – кога ќе биде забележан недозволив гест, судијата веднаш да свири крај. Па нека грицкаат семки надвор!“
Заклучок: Граѓаните се на работ на трпението
„Срамно од сите и за сите!“, „Големо ЗЛО!“, „Моронски патриотизам!“, се само дел од пораките на луѓето кои се чувствуваат обесправени, изманипулирани и оставени сами да се справуваат со еден феномен кој веќе одамна излезе од рамките на „спортско ривалство“.
ЦИВИЛ ги повикува институциите итно да преземат конкретни и ефективни мерки. Говорот на омраза не смее да се толерира – ниту на трибините, ниту било каде. Ако и натаму молчиме, соучествуваме во сопственото уништување.
A.M.
