На прашањето на денот „Што најмногу влијае на вашата изборна одлука?“ – граѓаните изразија длабоко разочарување и недоверба во политичкиот систем.
Голем дел од коментарите се сведуваат на ставот дека „нема за кого да се гласа“, а изборот се сведува на помало и поголемо зло. „Единствениот избор ни е меѓу две зла да го избереме помалото, а моменталната владејачка структура е најголемото зло што ѝ се случило на Македонија“, пишува еден од граѓаните, додавајќи дека уште поголем проблем се тие што ги гласаат.
Некои дури предлагаат целосен бојкот на изборите: „Крајно време е народот воопшто да не излегува на гласање. Наместо ситни лични интереси, да размислиме малку за државата. Ова како тргнало, за брзо ќе немаме држава.“
Меѓу најчестите причини за апатијата и недовербата се посочуваат економската состојба, сметките за електрична енергија, високите цени во маркетите, ниската минимална плата, падот на куповната моќ, злоупотребата на службените возила, ароганцијата на властите и „лажeњето во очи“.
Други коментари се осврнуваат на долгогодишниот политички циклус кој не носи промени: „33 години гледаме иста лакрдија. Со секои избори, јазот меѓу богатите и сиромашните е сѐ поголем.“
Дел од граѓаните нагласуваат дека нивниот избор би го определиле чесноста и искреноста на кандидатот, а потоа неговата способност, култура и визија за напредок на државата. Сепак, истите велат дека такви кандидати речиси и да нема. „Партијата не е битна, се разбира доколку има демократска идеологија. Но има ли такви во Македонија?“ – прашува еден од нив.
Покрај тоа, некои го истакнуваат недостигот на вистинска функција на општините и убеденоста дека „ништо не може да влијае“, освен личната понуда или ветувања на кандидатите – што пак отвора простор за клиентелизам.
Сумирано, одговорите покажуваат силно чувство на разочараност, недоверба и апатија кон политичкиот процес, со малку оптимизам дека ситуацијата ќе се промени во догледно време.
А.М.
