По повод Меѓународниот ден на земјоделците, граѓанската иницијатива „Спас за Валандово“, вчера со отворено писмо се обрати до своите поддржувачи, но и до сите засегнати граѓан(к)и од Валандово.
„Најголем дел од нашите сограѓани во валандовско се занимаваат со земјоделство, но иднината на земјоделците и фармерите е под голем знак прашалник, заради изградба на рударски комплекс во непосредна близина до нивните ниви, полиња и одгледувалишта на различни растенија и добиток. Ова значи опасност за исчезнување на земјоделието и фармерството од овој регион засекогаш!“, предупредуваат од граѓанската иницијатива.
Како што повторно потсетуваат од „Спас за Валандово“, последиците изградба на рударскиот комплекс за бакар би биле катастрофални.
„Загаден воздух, поради кој ќе имаме кисели дождови кои ќе ги наводнуваат полињата во нашиот регион, ќе имаме загадени и неконкуретни производи на пазарот… Ќе имаме загадени реки, каде рибарите го посветуваат своето време за да носат нешто за јадење во своите домови, каде сточарите гo напојуваат своjoт добиток“, се само дел од негативните последици кои се наведени во писмото.
„70% од населението живеат од земјоделие и фармерство, што ќе се случи со овие луѓе кога ќе почне работата во рудникот во Казандол? Што ќе се случи кога на нивите ќе почне да им вене производот во кој гледаат живот за нивните семејства? Што ќе се случи кога добитокот ќе се разболува и ќе почне да умира? Како ќе живеат тие луѓе, како ќе живееме ние во овој регион, коишто зависиме од земјоделие и фармерство?“, прашуваат од „Спас за Валандово“.
Граѓанската иницијатива „Спас за Валандово“ ( #СпасЗаВаландово #ИнформирајСе #АктивирајСе) започна кампања за зачувување на еколошки чистата Валандовска котлина, за разумно и транспарентно раполагање со нејзините ресурси и за запирање на сите активности околу работата на рударскиот комплекс за производство на катоден бакар.
М. Теговска
