Во текот на ноќта меѓу 17 и 18 декември 2025 година, по наредба на јавен обвинител од Основното јавно обвинителство за гонење на организиран криминал и корупција, полициски службеници од Одделот за организиран и сериозен криминал спроведоа координирана акција на повеќе локации во Скопје и околината, како и во Куманово, Неготино, Велес, Пехчево, Пробиштип и Кочани.
Во акцијата беа лишени од слобода 11 лица.
Министерството за внатрешни работи до ОЈО за ГОКК поднесе кривична пријава против 33 физички лица и две правни лица од Скопје и Куманово. Осомничените се товарат за кривични дела:
„злосторничко здружување“, „злоупотреба на постапка за јавна набавка“, „злоупотреба на службена положба“ и „перење пари“.
Според истрагата, во текот на 2023 година била формирана организирана група со цел незаконско влијание врз постапки за јавни набавки поврзани со ЕСМ Дистрибуција на топлина. Групата, со однапред договорени технички спецификации, овозможила доделување договор за набавка на СКАД ормари за мониторинг на топлински станици на однапред избрано правно лице.
Со манипулации во постапката, договорот бил доделен на фирма од Скопје, која се стекнала со противправна имотна корист од 400,4 милиони денари без ДДВ, односно 472,4 милиони денари со ДДВ (околу 7,68 милиони евра), на штета на буџетот на ЕСМ.
По извршувањето на кривичните дела, дел од осомничените во периодот од 2023 до 2025 година извршиле перење пари во износ од 125,5 милиони денари (над 2 милиони евра), со цел прикривање на потеклото и движењето на незаконски стекнатите средства.
