Изјавите на премиерот Христијан Мицкоски за случајот со Никола Груевски и неговото „чувство“ дека поранешни премиери од СДСМ ќе завршат во затвор, предизвикаа бурни реакции на социјалните мрежи.
На ПРАШАЊЕ НА ДЕНОТ: Што мислите за изјавите на Мицкоски за Груевски и „чувството“ дека експремиери на СДСМ ќе одат в затвор? – што ЦИВИЛ го постави на Фејсбук граѓаните изнесоа спротивставени ставови, отворајќи дебата за независноста на судството, политичкото влијание и состојбата во државата.
Дел од коментарите остро ја критикуваат изјавата, оценувајќи дека таа претставува директен притисок врз институциите.
„Изјавата на ‘вождот’ е доказ дека ‘независното судство’ го има ставено во скут. И судството и обвинителството не се независни одамна“, пишува еден граѓанин.
„Чувствителен премиер – чувствува што ќе работи ‘независното’ судство. Тоа не е чувство, тоа е наредба“, додава друг.
Во сличен тон се и коментарите дека ваквите изјави ја поткопуваат довербата во правосудниот систем:
„Политиката не се води со чувства. Ова личи на најава кој ќе биде гонет, а кој не.“
Некои од граѓаните одат и чекор подалеку, оценувајќи дека станува збор за отворено мешање во работата на обвинителството:
„Порака до обвинителството кого да апси – тоа е еклатантен доказ дека власта го контролира судството.“
Сепак, има и поумерени и спротивни мислења. Дел од коментаторите повикуваат на воздржаност и поинакво толкување на изјавата.
„Можете и од друг агол да го протолкувате. Во време на опозиција имаше многу пријави што стоеја во фиока. Сега се очекува тие да се отворат“, пишува една граѓанка.
Таа додава дека изјавата може да се сфати како очекување, а не како притисок: „Сè е во рацете на Јавното обвинителство. Да не се истрчуваме – времето ќе покаже.“
Во дел од реакциите, вниманието се насочува и кон пошироката политичка и општествена состојба.
„Од ‘рекла-казала’ ни оди државата. Наместо план за излез од кризата, се вртиме во круг и губиме време“, гласи еден од коментарите.
Други пак предупредуваат на последиците врз младите:
„Додека тие се занимаваат со истите теми, младите и стручните кадри си заминуваат.“
Прашањето за евентуално враќање на Никола Груевски исто така беше дел од дискусијата, при што некои граѓани упатуваат директни пораки: „Порака до Груевски – да не се враќа.“
Реакциите покажуваат длабока поларизација во јавноста, но и силна чувствителност кон теми како што се владеењето на правото и независноста на институциите. Додека едни гледаат политички притисок, други очекуваат конечно процесуирање на случаи што долго време стоеле во застој.
Б. Ј.
