СОФИЈА, 20 април 2026 (10:00) – Осмиот обид конечно донесе исход. Со обработени 91,68% од протоколите на Централната изборна комисија, коалицијата „Прогресивна Бугарија“ предводена од Румен Радев освои 44,69% од гласовите.
Поради прераспределбата на гласовите од партиите што не го поминаа изборниот праг од 4%, се проектира дека блокот на Радев ќе располага со околу 131 пратеник – десет повеќе од потребните 121 за апсолутно мнозинство во 240-члениот парламент.
Овој резултат ја прекинува долгогодишната политичка парализа, но ќе отвори нови предизвици. По серија од осум избори во пет години, Бугарија за првпат добива стабилно парламентарно мнозинство, јасен носител на извршната власт и капацитет за самостојно формирање влада. Со други зборови, политичката математика што досега зависеше од кревки договори и минимални разлики – практично исчезнува.
Обидите на проевропските партии да формираат т.н. „санитарен кордон“ околу Радев, со цел да го ограничат неговото влијание, се покажуваат како неуспешни. Со ваква распределба на мандати, Радев не зависи од коалициски партнери, не е ограничен од парламентарни условувања и има целосен маневарски простор за формирање влада.
Официјалната излезност се движи околу 48,5%, што укажува на умерен одзив на гласачите. Тоа создава ситуација во која силното парламентарно мнозинство се темели врз релативно ограничена излезност.
Со обезбедено апсолутно мнозинство, Радев добива можност да ја редефинира политичката и стратешката насока на земјата. Неговите ставови за војната во Украина, односите со Русија и улогата на Бугарија во ЕУ и НАТО ќе бидат сериозен предизвик за Европа. Со овие избори, Бугарија затвори една фаза – пет години политичка криза – но затоа отвора нова – неизвесна геополитичка ориентација.
Џ. Дерала
