Пишува: Љубомир Костовски
Според последната изјава на претседателката на дежелата Наташа Пирц Мусар, ниту една партија не може да состави влада. Ова може да значи дека таа ќе мора да го распушти Парламентот и да распише нови избори. Истовремено претседателот на минијатурната партија и воедно спикер во законодавниот дом нема да може да распишува референдум кој би бил несомнено опасен во однос на целината на Европа и НАТО сојузот!
Премиерот на Словенија, кој моментално е во технички мандат, Роберт Голоб призна дека неговата партија не успеала да формира влада, што би можело да го отвори патот за враќање на популистот Јанез Јанша, објавија словенечките медиуми.
Да се потсетиме дека либералното Движење за слобода на Голоб победи на парламентарните избори минатиот месец со тесна разлика, освојувајќи 29 од 90-те места во словенечкиот парламент, но не успеа да обезбеди парламентарно мнозинство. По еден месец неуспешни коалициски преговори, Голоб рече дека ја информирал словенечката претседателка Пирц Мусар дека неговата партија се согласила да премине во парламентарната опозиција.
Се очекуваше Јанша, чија Словенечка демократска партија освои 28 места на изборите минатиот месец, дека ќе се обиде да формира десничарска коалициска влада.
Голоб изјави дека неговата партија „се радува на работата во опозиција“, додека неговиот ривал Јанша најави дека е подготвен за сите сценарија – подготвена да формира влада, да остане во опозиција или да учествува на повторени избори.
Изјавата доаѓа по консултациите со претседателката на Словенија, Пирц Мусар. Голоб ја искористи можноста да ја нападне потенцијалната нова влада. Тој ја нарече „коалиција на измамници“ и рече дека нема да трае долго.
„Коалиција на измамници што нема да трае“, изјави Голоб.
Лидерот на Слобода беше остар кон противниците. Тој рече дека оние што ги лажат граѓаните ги рушат темелите на демократијата. Во исто време, порача дека неговата партија ќе делува од опозиција.
Претседателот на пратеничката група на Слобода, Борут Сајовиц, ексминистер за одбрана во владата на Голоб, нагласи дека партијата нема доволно гласови. Тој посочи дека им недостигаат пратеници за стабилно мнозинство од 46 пратеници. Додаде дека тие не сакаат поддршка преку уцени или поткуп.
Ситуацијата во оваа земја воопшто не беше розова, бидејќи порано овој месец, партијата на Јанша го поддржа обидот на проруската партија Ресни.ца и нејзиниот лидер Зоран Стевановиќ да биде избран за претседател на словенечкиот парламент. Овој потег беше широко протолкуван како сигнал за сојуз меѓу двете популистички партии, но Јанша, по средбата со Пирц Мусар денеска, призна дека неговата партија сè уште не ја обезбедила потребната поддршка за враќање на власт.
Инаку, тоа е познато, Стевановиќ најави од позиција на потенцијален спикер на Парламентот дека има намера да распише референдум па народот да одлучи дали би останале во НАТО или не. Тоа не би бил потег на кој со благонаклонетост би се гледало во Брисел, како кај челниците на ЕУ, така и во НАТО.
За ваков исход постоеше и можност на крајот од минатата недела. Лидерот на демократите, Анже Логар, поранешен словенечки министер за надворешни работи под Јанша и поранешен член на СДС, ги напушти преговорите со Слобода. Во тој миг Слобода тврдеше дека преговорите со Логар, чија партија освои шест претставници на изборите, воопшто и не се случиле и дека овој политичар, кој во голем дел од предизборната кампања се бранеше од обвинувањата на јавноста дека тој е „скриениот адут“ на Јанша, се покажа токму таков.
Партијата на Јанша, кој на изборната ноќ нагласи дека нема да формира „слаби влади“, со поддршка на предизборната коалиција предводена од НСИ (осум пратеници), Демократите (шест пратеници) и Ресни.ца (пет пратеници), би имала повеќе од 46 пратеници потребни за мнозинство во словенечкиот парламент, кој има вкупно 90 места.
Што е следно?
Претседателката на Словенија мора да предложи кандидат за премиер најдоцна 30 дена по конститутивната седница на парламентот, односно до 10 мај, а парламентот гласа за кандидатот најдоцна седум дена по поднесувањето на предлогот, со мнозинство гласови од сите претставници.
Во случај кандидатот да не го добие потребното мнозинство гласови во првиот круг, се одржуваат уште два круга, по што, во случај на неуспех, претседателката го распушта собранието и распишува нови избори.
Специјално за ЦИВИЛ МЕДИА | Сите права се задржани.
