ЦИВИЛ во денешното соопштение бара државата итно да ги санира студентските домови и, додека трае санацијата, да обезбеди привремено сместување на студентите на државен трошок во хотелски или други соодветни капацитети, сѐ додека домовите не исполнат безбедни, хигиенски и достоинствени услови за живот.
Барањето доаѓа по информациите за појава на стаорци, недостиг на топла вода, проблеми со лифтовите и други сериозни недостатоци во студентските домови, кои, според организацијата, претставуваат недозволива состојба и директно го загрозуваат здравјето, безбедноста и достоинството на студентите.
„Студентите не смеат да бидат оставени сами да се борат со стаорци, студени тушеви, нефункционални лифтови и институционална рамнодушност“, порачува ЦИВИЛ.
Организацијата бара итна и јавна реакција од надлежните институции, конкретни рокови за санација на состојбите во студентските домови, навремена исплата на студентските стипендии и целосна одговорност за пропустите.
Според ЦИВИЛ, студентскиот стандард не е споредна ставка во буџетот, ниту простор за политички калкулации и административни изговори, туку директна инвестиција во иднината на земјата.
Д. М.
ЦИВИЛ: Студентските домови не смеат да бидат симбол на државна негрижа
