Прашањето што го отвори ЦИВИЛ Медиа на Фејсбук: Што мислите за ставовите на Мицкоски и Филипче за бугарското прашање?“ предизвика бројни реакции, коментари и дебати меѓу граѓанките и граѓаните. Дел од нив сметаат дека политичките партии го користат спорот со Бугарија за дневнополитички поени, додека други предупредуваат дека уставните измени не смеат да се прифатат под притисок.
Во коментарите доминира чувство на разочараност од политичката сцена и недоверба кон двете најголеми партии.
„Мислам дека СДСМ работи за растење на рејтингот на ВМРО со самото тоа што инсистира на уставни измени. Сè е глума, као ние се расправаме, нема за кого да се гласа“, наведува еден граѓанин, додавајќи дека излезноста на изборите ќе продолжи да опаѓа.
Други коментатори сметаат дека процесот на евроинтеграции не смее да биде блокиран и дека е потребен политички консензус.
„Треба сите лидери на политички партии да седнат и да имаат еден став прифатлив за сите и без штета на Македонија, а и за Бугарија да бидат сите победници“, гласи еден од коментарите.
Сличен став има и друг граѓанин кој порачува дека „сите треба заедно да седнат на маса и да го решат проблемот – Македонија во ЕУ, тоа е формулата“.
Дел од реакциите се насочени кон актуелната власт и премиерот Христијан Мицкоски, со оценка дека не постои реална политичка волја за придвижување на процесот кон ЕУ.
„Факт е дека Мицкоски не сака почеток на преговори со ЕУ и ќе наоѓа разни изговори, а тоа ќе трае со години“, пишува еден коментатор.
Од друга страна, има и граѓани кои сметаат дека уставните измени се наметнат услов и дека не треба да се прифатат.
„На Бугарите не смееме да им веруваме. Диктатот за додавките во Уставот не е последен услов. Никако да не се прифаќа бугарската уцена“, наведува еден од учесниците во дебатата.
Во дискусијата се појавуваат и пошироки геополитички оценки и критики кон политичките елити во земјата.
„После 35 години сè уште да се крстиш во овие две партии треба да си навистина луд“, гласи еден од покритичните коментари.
Имаше и реакции од граѓани кои сметаат дека интеграцијата во ЕУ е неизбежен процес.
„Како што беше влезот во НАТО, така и ова ќе биде“, пишува еден коментатор, додавајќи дека одлуките на крај ќе бидат донесени под меѓународен притисок.
Во дел од коментарите се забележуваат и националистички и ксенофобични ставови, како и меѓусебни обвинувања за влијанија од соседните држави, што дополнително ја покажува поларизираноста на јавноста околу односите со Бугарија и европската перспектива на државата.
Венко Филипче во изминатиот период повторно повика на продолжување на евроинтегративниот процес и усвојување на уставните измени, додека Христијан Мицкоски останува на ставот дека нема да прифати промени под бугарски диктат без дополнителни гаранции од ЕУ.
Б. Ј.
