Според американскиот Newsweek, кој се повикува на најновата анкета спроведена од Институтот за истражување на јавната религија (Public Religion Research Institute – PRRI), мнозинството Американци го доживуваат претседателот Доналд Трамп како „опасен диктатор“ чија моќ мора да биде ограничена за да се заштити демократијата.
Истражувањето, кое опфатило 5.469 полнолетни граѓани од сите 50 сојузни држави, покажува дека дури 59 проценти од испитаниците се согласуваат со оваа остра квалификација. Ова претставува забележителен раст во споредба со март истата година, кога овој став го делеле 52 отсто од граѓаните, а го надминува и претходниот пик од септември 2025 година (56 отсто). Наспроти ова, 38 отсто од анкетираните веруваат дека Трамп е силен лидер на кого треба да му се дадат сите потребни овластувања за да ја врати големината на Америка. Иако републиканците главно го поддржуваат овој став, сепак се забележува пад на нивната поддршка од 81 на 78 отсто.
Како што пренесува Newsweek, Белата куќа веднаш реагирала на ваквите резултати. Портпаролот Дејвис Ингл во изјава испратена до медиумот нагласи дека „вистинската анкета“ се случила на изборите во ноември 2024 година, кога речиси 80 милиони Американци убедливо го избрале Трамп да ја спроведе својата програма. Ингл додава дека претседателот неуморно работи на создавање работни места, намалување на инфлацијата и зголемување на пристапноста до станбен простор, постигнувајќи историски резултати.
Newsweek објаснува дека ваквиот скок на незадоволството доаѓа во време на сериозни геополитички тензии. Имено, анкетата е спроведена во мај, период кога администрацијата на Трамп се обидува да стави крај на војната со Иран која трае повеќе од 100 дена, а започна по американско-израелските воздушни напади. Оваа воена акција наиде на сериозни критики во Конгресот, каде што и демократите и дел од републиканците тврдеа дека претседателот ги пречекорил своите уставни овластувања со тоа што не побарал одобрување од законодавниот дом.
Претставничкиот дом дури изгласа и резолуција за воени овластувања со цел да ги ограничи воените акции на Трамп во Иран, при што четворица републиканци гласаа заедно со демократите. Од друга страна, официјални претставници на Белата куќа изјавија за Newsweek дека оваа резолуција нема да има правна сила и нема ни да стигне до бирото на претседателот.
Податоците од анкетите што ги цитира Newsweek јасно покажуваат дека јавноста е длабоко поделена и незадоволна од начинот на кој се води војната:
- Дури 66 отсто од Американците имаат неповолно мислење за менаџирањето на конфликтот со Иран.
- Според анкета на ABC News/Washington Post/Ipsos, 61 отсто сметаат дека започнувањето на војната било грешка. Меѓу поддржувачите на Трамп има поделба – додека 86 отсто од таканаречените MAGA републиканци ја оправдуваат војната, кај умерените републиканци таа поддршка паѓа на 50 проценти.
Освен надворешната политика, Трамп бележи пад на поддршката и на домашен план, особено по прашањето за имиграцијата. Иако во кампањата ветуваше масовни депортации од околу еден милион луѓе годишно, анкетата на PRRI покажува дека само 37 отсто од граѓаните го одобруваат неговиот пристап кон имиграцијата, додека 58 отсто не се согласуваат со него. Овој пад е видлив кај сите политички струи, па дури и кај републиканците, каде што поддршката за неговите имиграциски политики паднала од 90 на 82 отсто. Други анкети, како онаа на Универзитетот Харвард и Правниот факултет Маркет, исто така потврдуваат дека мнозинството Американци не го одобруваат неговиот начин на справување со имиграциската криза.
Д. Мишев
Во ера на дезинформации, националистички популизам и авторитаризам, неопходна е вашата поддршка за ЦИВИЛ
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА
