Русија изврши нов масовен ракетен и дронски напад врз Украина, при што беа погодени цивилни цели, инфраструктура и населени места во повеќе региони на земјата. Според украинските власти и меѓународните извештаи, нападите на 29 јуни однесоа човечки животи во Днипро, Запорижја, Суми, Харкив и други делови на Украина.
Во Днипро, руски ракетен напад врз инфраструктурен објект уби пет лица, а 29 беа повредени. Во Запорижја, руски удар погоди патнички минибус; според првичните информации, загинаа три лица, а повеќе патници беа повредени, меѓу нив и дете. Украинските власти соопштија дека руските напади во текот на денот погодиле и други региони, со нови цивилни жртви и оштетувања на инфраструктурата.
Амбасадорката на Украина во Северна Македонија, Лариса Дир, во објава на платформата X порача дека нападите претставуваат системски терор врз цивилното население.
„рф изврши масовен ракетен напад врз Украина: во Днипро загинаа 5 лица, 29 се повредени; во Запорижја е погоден автобус. Ова е системски терор врз цивилното население. Единствениот одговор е зајакнување на заштитата на украинското небо и забрзан развој на противбалистички капацитети со партнерите“, напиша Дир.
Пораката на амбасадорката се совпаѓа со повторениот повик на украинските власти за итно зајакнување на противвоздушната и противбалистичката одбрана. Претседателот на Украина, Володимир Зеленски, ги осуди последните руски напади како ужасни и порача дека луѓето мора да добијат поголема заштита од вакви удари. Тој нагласи дека најитно се потребни противбалистички капацитети и дека Европа мора да биде што поактивна во развојот на сопствени системи и ракети за противбалистичка одбрана.
рф изврши масовен ракетен напад врз🇺🇦: во Днипро загинаа 5 лица, 29 се повредени; во Запорижја е погоден автобус. Ова е системски терор врз цивилното население. Единствениот одговор е зајакнување на заштитата на🇺🇦небо и забрзан развој на противбалистички капацитети со партнерите pic.twitter.com/rkdN60c5KP
— Larysa Dir (@dir_larysa) June 29, 2026
Според украинските воздухопловни сили, Русија во текот на ноќта лансирала 108 беспилотни летала кон Украина, од кои украинската противвоздушна одбрана соборила 82. И покрај тоа, дел од ракетите и дроновите погодиле цивилни и инфраструктурни цели, што повторно ја покажува потребата од дополнителни системи за заштита на украинското небо.
Нападите предизвикаа и прекини во снабдувањето со електрична енергија во повеќе региони. Украинскиот оператор на електроенергетската мрежа соопшти дека дел од потрошувачите во осум региони останале без струја по руските удари, во услови кога високите температури дополнително ја зголемуваат потрошувачката на електрична енергија.
Руските напади врз цивилни цели се модел на војување. Москва продолжува да користи ракети, ударни беспилотни летала, артилерија и други средства за напади врз градови, јавен превоз, енергетски објекти, станбени зони и критична инфраструктура. Иако Кремљ тврди дека не таргетира цивили, последиците на теренот постојано покажуваат спротивна реалност: загинати и повредени цивили, уништени домови, оштетена инфраструктура и секојдневен терор врз населението.
Во текот на 29 јуни, украинските медиуми и локални власти јавија дека бројот на жртви од руските напади низ земјата продолжил да расте. Според подоцнежните извештаи, руските напади во повеќе региони убиле најмалку 16 лица и повредиле повеќе од 120 луѓе. Бројките остануваат подложни на промени, бидејќи спасувачките служби и локалните власти продолжуваат со расчистување на последиците од нападите.
Во исто време, Русија продолжува со воени операции на фронтот и со напади врз украинската заднинска инфраструктура, додека украинските сили ги засилуваат ударите врз руската воена логистика, командни точки, мостови и објекти што ја поддржуваат агресијата. Украина инсистира дека ваквите дејства имаат цел да го намалат воениот и економскиот потенцијал на агресорот.
Последниот масовен напад ја потврдува главната порака на Кијив: осудата не е доволна. За да се спасат цивилни животи, потребни се конкретни и забрзани одлуки – дополнителни системи за противвоздушна одбрана, развој на противбалистички капацитети, построги санкции против руската воена економија и континуиран меѓународен притисок врз Москва.
Украина повторно предупредува дека секое одложување има човечка цена. Нападите врз Днипро и Запорижја се уште еден доказ дека руската агресија останува насочена не само кон украинската држава, туку и кон цивилниот живот како таков.
Џ. Д.
Во ера на дезинформации, националистички популизам и авторитаризам, неопходна е вашата поддршка за ЦИВИЛ
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА
