Промотивниот спот на Владата за одбележување на 35-годишнината од независноста на државата стана повод за остра политичка пресметка меѓу опозициската Демократска унија за интеграција (ДУИ) и владината коалиција ВЛЕН. Додека ДУИ ја обвинува власта за промовирање на „ексклузивно македонска верзија“ на историјата во која Албанците се невидливи, од ВЛЕН се дистанцираат од видеото и возвраќаат со обвинувања за долгогодишна злоупотреба на Охридскиот договор.
ДУИ: Владата ги избриша Албанците, Охридскиот договор и НАТО од историјата
Во своето писмено соопштение, ДУИ упати остри критики кон Владата, нагласувајќи дека наместо јубилејот да го претставува заедничкиот пат на сите граѓани, тој прикажува исклучувачки наратив.
„Спотот е само на македонски јазик. Уметниците се Македонци. Албанците практично не постојат во наративот што Владата го подготви за 35-те години на државата“, реагираат од партијата.
Тие изразуваат посебна загриженост поради тоа што една од централните фигури во спотот е оперскиот пејач Игор Дурловски, потсетувајќи на неговата поврзаност со упадот во Собранието на 27 април 2017 година.
Од ДУИ посочуваат дека од државниот наратив намерно се избришани клучни историски моменти кои ја трансформирале земјата од етнички проект во заедничка држава: Охридскиот рамковен договор, членството во НАТО и Првата меѓувладина конференција со ЕУ.
„Албанците можеби ги има на листата на министри, но ги нема во наративот на државата. Ги има како имиња и бројки за декор, но не и како присуство, влијание и фактор на одлучување“, порачуваат од партијата.
Соопштението на ДУИ завршува со пораката:
„А Вреди, едноставно не вреди ништо!“.
ВЛЕН: Не сме информирани за спотот, а Охридскиот договор не е сопственост на ДУИ
Реакцијата од коалицијата ВЛЕН не изостана. Портпаролот на коалицијата, Дритон Сулејмани, јасно стави до знаење дека тие не биле вклучени во овој владин проект. Според ставот на ВЛЕН, тие ниту го виделе промотивното видео пред неговото објавување, ниту биле информирани за неговото планирање и организација.
Одговарајќи на прозивките од ДУИ во врска со Охридскиот договор, од ВЛЕН истакнаа дека овој документ е историско достигнување на Албанците, а не приватна сопственост на партијата од Мала Речица. Според владејачката коалиција, Рамковниот договор претставува „обврска за конкретна работа“, а не тема која треба да се споменува само кога се наближуваат државни јубилеи.
ВЛЕН возврати со обвинување дека ДУИ со години го експлоатирала Охридскиот договор како политички капитал исклучиво за лично богатење. Од коалицијата порачаа дека нивниот фокус во иднина не е на симболиката, туку на законското гарантирање на правичната етничка застапеност во институциите и на спроведувањето на вистинска децентрализација.
Д. Муратов
