Американскиот специјален пратеник Стив Виткоф предизвика остри реакции откако на средбата со рускиот диктатор Владимир Путин во Москва му порача дека спомените од нивните средби еден ден ќе бидат меѓу највпечатливите во неговиот живот. Американската прогресивна платформа Occupy Democrats го оцени настапот како несоодветно додворување на лидерот со кого Виткоф истовремено се обидува да преговара за завршување на руската војна против Украина.
На почетокот на средбата во Кремљ во саботата, Виткоф му раскажа на Путин за разговор што непосредно претходно го водел со Џаред Кушнер и руските претставници.
„Зборувавме за тоа дека кога ќе се пензионираме ќе имаме неверојатни приказни и неверојатни спомени, а спомените со вас ќе бидат на самиот врв“, му рече Виткоф на рускиот претседател.
Изјавата беше снимена и објавена од Кремљ. Тоа беше осма посета на Виткоф на Москва во својство на специјален пратеник на Доналд Трамп, но неговите досегашни мисии не успеаја да донесат крај на војната.
По повеќе од три часа разговори со Путин, Виткоф и Кушнер ја напуштија Москва без објавен конкретен пробив. Советникот на Путин, Јуриј Ушаков, средбата ја опиша како „многу корисна“, додека американската страна најави дека следните чекори ќе бидат соопштени во наредните недели.
Следниот ден двајцата отпатуваа во Кијив, во нивната прва официјална посета на украинската престолнина како мировни пратеници на Трамп, каде што разговараа со претседателот Володимир Зеленски.
Ниту разговорите во Кијив не донесоа договор. Главната пречка останува територијалното прашање: Москва бара Украина да се повлече и од делови од Донбас што сè уште се под украинска контрола, што Кијив го одбива. Зеленски по средбата изјави дека сложените територијални прашања можат да се решаваат само на ниво на лидери, а како клучни теми ги наведе и безбедносните гаранции и идната економска обнова на земјата.
Occupy Democrats особено го критикува токму контрастот меѓу дипломатската задача на Виткоф и неговиот исклучително топол однос кон Путин.
„Постои нешто што се нарекува ласкање на противникот заради стратешка предност“, забележува платформата, но прашува каква предност добил американскиот пратеник со тоа што на човекот кој ја започна инвазијата врз Украина му кажува дека средбите со него ќе бидат меѓу најдрагите спомени од неговата кариера.
Во објавата жестоко се критикува и изборот на Трамп да ги користи Виткоф и својот зет Кушнер како клучни посредници во една од најсложените дипломатски мисии на Вашингтон, со оценка дека нивниот досегашен ангажман не донел резултат што би ја приближил војната кон крај.
ЦМ Деск
