Припадник на српската Жандармерија го усмрти малолетниот напаѓач кој со два ножа го нападнал пред израелската амбасада во Белград, извикувајќи „Алаху Акбар“, соопшти министерот за внатрешни работи Ивица Дачиќ. Полицаецот бил полесно повреден, а српските власти го оквалификуваа инцидентот како терористички напад и го подигнаа нивото на безбедносна закана на највисокиот, црвен степен.
Според информациите на српското Министерство за внатрешни работи, напаѓачот бил малолетно лице од Шабац. Министерот за внатрешни работи во технички мандат, Ивица Дачиќ, соопшти дека напаѓачот му се приближил на припадникот на Жандармеријата кој ја обезбедувал амбасадата, извикувајќи „Алаху Акбар“, а потоа го нападнал со два ножа.
Полицаецот пукал во самоодбрана и го усмртил напаѓачот. При нападот се здобил со полесни повреди во пределот на лицето. Надлежните органи допрва треба да ги утврдат сите околности на инцидентот.
По нападот, Дачиќ соопшти дека е донесена одлука за подигнување на нивото на безбедносна закана од тероризам на највисокиот степен, означен како црвено ниво.
Мерките предвидуваат засилено полициско присуство и зголемена безбедност на локации од посебно значење, вклучително и дипломатските претставништва и инфраструктурните објекти. Целта е да се спречат можни нови инциденти и да се обезбеди заштита на граѓаните и институциите.
Дачиќ изјави дека напаѓачот им бил познат на безбедносните служби и дека бил следен поради наводни радикални ставови. Според министерот, постоеле сознанија за негова поддршка на терористичката организација Исламска држава, вклучително и преку профил на Инстаграм на кој, наводно, објавувал симболи поврзани со организацијата.
Инцидентот потсетува на нападот од 29 јуни 2024 година, кога напаѓач со самострел ранил полициски службеник кој ја обезбедувал израелската амбасада во Белград. Полицаецот возвратил со огнено оружје и го усмртил напаѓачот.
Б. Ј.
