Реформистите на ВМРО-ДПМНЕ денеска на прес-конференција ја презентираа Декларацијата „Европско ВМРО-ДПМНЕ за европска Македонија“, со намера да направат јасна разлика меѓу политиките на реформираното ВМРО–ДПМНЕ, што ќе носат прогрес и развој на Македонија и политиките на актуелното раководство на ВМРО-ДПМНЕ, коишто ја донесоа партијата до целосна изолација.
„Тоа беа политики на барање надворешни и внатрешни непријатели на Република Македонија, политики на ширење на анти-ЕУ и анти-НАТО пропаганда, политики на лажен патриотизам, политики на креирање лажни вести, како што ги нарекува претседателот Трамп – ‘фејк њуз’, со цел да се шири параноја и страв кај македонските граѓани. Ние треба да расчистиме со тоа“, порача Александар Михајловски, еден од носителите на Иницијативата за реформи во ВМРО-ДПМНЕ.
Тој посочи дека членови на партијата, веќе отворено и масовно потпишуваат изјави со кои што ја прифаќаат Декларацијата за реформи на ВМРО-ДПМНЕ.
„Треба на сите да ни биде јасно, посебно на членовите на ВМРО-ДПМНЕ, дека доколку партијата не се реформира, ВМРО-ДПМНЕ никогаш нема да се врати на власт! Имаме лидер со одземен пасош, изолиран од меѓународната заедница и човек за кого што се водат судски постапки. Со кој капацитет ќе го води ВМРО-ДПМНЕ во иднината и како ќе настапи на овие локални избори, со тој товар што го носи и за него и за партијата? ВМРО-ДПМНЕ треба и мора да се реформира, ако сакаме да одиме напред, ако сакаме да изградиме силни политики, што ќе му овозможат на следните парламентарни избори, повторно да ја добие поддршката од граѓаните, и да ја формира новата влада“, рече Михајловски.
Целта на реформистите е партијата да се врати во рацете на членството, „зашто, последните години е целосно узурпирана, без никаква демократија“. А, кандидатите за овие локални избори, како што велат, се номинираат без никаква демократија и во нетранспарентна постапка.
„Без да се почитува волјата на базата на партијата, наводно се вршеле некакви анкетирања. Кој ги вршел тие анкети, која е целната група, дали анкетите се веродостојни и дали се доволен фактор за избор на кандидатите од ВМРО-ДПМНЕ? Дали тој кандидат има поддршка од базата на партијата? Тие прашања нас нè загрижуваат и покажуваат дека нашата Иницијатива е целосно оправдана и уште повеќе, потврдува дека на ВМРО-ДПМНЕ му треба целосна демократизација!“, истакна Михајловски.
Тој не одговори на новинарско прашање дали реформистите ќе излезат со свои советнички листи, но рече дека наскоро по разговорите во Штабот за реформи, ќе излезат со став за настапот на локалните избори.
Моника Талеска
Камера: Дехран Муратов
