Во понеделник, на 25 септември, почнува изборната кампања за Локалните избори 2017 што треба да се одржат на 15 октомври.
Кампањата за првиот изборен круг завршува на 13 октомври во 24 часот.
Иако официјалниот старт на предизборната кампања е во понеделник, кандидатите за градоначалници одамна ја започнаа својата кампања во општините, преку средби со граѓаните.
Партиите како и на претходните, предвремените парламентарни избори, веќе започнаа со кампањата, која и оваа година е повеќе насочена кон оцрнување на противниците, наместо кон реална понуда на програми.
Со жрепка во Државната изборна комисија беше утврден редоследот во Единствената листа на кандидати на гласачките ливчиња. Листи со кандидати за градоначалници и за советници имаат поднесено 19 партии и коалиции, а 64 се од групи избирачи.
Прва на гласачкото ливче ќе биде СДПМ, втора – Коалицијата Алијанса на Албанците и НДП, трета – ДУИ, четврта – Коалицијата за Битола (ДУИ, Беса и Алијанса на Албанците), петта – Коалицијата „Заедно за Гази Баба“, предводена од Беса, шеста – НДМ, седма – ВМРО-ДПМНЕ, осма – Народно движење на Турците, деветта – Алијанса на Албанците, десета е ТМРО, единаесетта – Демократската парттија на Турците, ГРОМ е 12-ти, Коалицијата предводена од ВМРО-ДПМНЕ е 13-та, Беса е 14-та, ДПА е 15, Левица е 16, ПДП е 17-та, Сојузот на Роми е 18-ти, а СДСМ е 19-та на гласачкото ливче.
Листите на кандидати за членови на совет и листите на кандидати за градоначалник, кои се поднесени од ист подносител ќе имаат ист реден број во сите општини.
Во општината каде што нема свој претставник, соодветниот број на подносителот ќе биде изоставен и на негово место ќе биде напишан редниот број на наредниот носител, без оставање на празно место.
Избирачкиот список во кој се извршени сите промени, отпечатен во вид на изводи, ДИК го заклучува најдоцна до 24 септември. ДИК го потпишува Избирачкиот список и изводите од него, најдоцна до 29 септември.
Шестите локални избори во Македонија се закажани за 15 октомври, а ќе се спроведуваат на 3.480 избирачки места во 80 општини и во Градот Скопје. Изборната кампања ќе почне на 25 септември на полноќ и ќе заврши на 13 октомври.
Вториот круг од изборите е закажан две недели подоцна, на 29 октомври. Изборната кампања за вториот круг завршува на 27 октомври во 24 часот.