СВР Битола, постапувајќи по наредба на Основното јавно обвинителство за предметот „Транспортер 2“, што се однесува на распишан тендер за избор на најповолен понудувач за превоз на ученици, поднесе посебен извештај против шест лица вработени во Општината, меѓу кои и за градоначалникот Владимир Талески.
Од МВР информираат дека има основано сомневање за сторени две кривични дела – „несовесно работење во службата“ и „злоупотреба на службена положба и овластување“.
Четири лица, во својство на членови на Комисијата за јавни набавки при Општина Битола, не ја поништиле постапката за избор на најповолен понудувач, иако во тендерската постапка констатирале дека понудените цени за превоз на ученици во учебната 2015-2016 се многу повисоки од реалните цени на пазарот.
Секретарот на Општина Битола, иако немал ингеренции врз работата на Комисијата за јавни набавки, потпишал согласност за склучување на договори, а градоначалникот на Битола, донел одлука за најповолни понудувачи на тендерот за превоз на ученици и потпишал штетни договори со две правни лица, превозници од Битола, велат од полицијата.
Со преземените дејствија пријавените ја оштетиле Општината за над четири милиони денари, се вели во соопштението од МВР.
Минатата година, градоначалникот Талески беше три месеци во куќен притвор, како првоосомничен во случајот „Транспортер“ на Специјалното јавно обвинителство.
СЈО го осомничи дека заедно со секретарот на Општината, директори на училишта и превозни компании, организирале школски превоз за учениците по цени повисоки од реалните. Талески тврдеше дека се работи за политички монтиран процес. Од куќниот притвор беше ослободен на 19 септември 2016 година, со обврска два пати неделно да се јавува во Судот во Битола.
