Извршниот комитет на ВМРО-ДПМНЕ бара итно и неодложно ослободување и амнестирање на сите извршители на одредени законски прекршувања во „крвавиот четврток“. Според најавите, пратеничката група на коалицијата ќе поднесе амандман на Законот за амнестија или ќе предложи посебен закон за прекин на постапката и ослободување на лицата учесници во немилите настани од 27 април 2017.
„Сметаме дека овој чин ќе придонесе кон помирување во Македонија и релаксирање на политичките тензии. ВМРО-ДПМНЕ иако беше со блиски, а во некои делови и идентични ставови со ставовите на граѓаните коишто мирно протестираа цели 80 дена, беше првата партија која што јавно ги осуди законските прекршувања од дел од граѓаните, што протестираа и со тоа се наруши мирниот карактер на овие граѓански протести. Сепак, гледајќи од денешна гледна точка, кога пред очите на целата јавност со политичка одлука и интервенција се ослободуваат огромен број сторители на тешки кривични дела, меѓу кои и свирепи убиства на етничка база, што говори дека е ова масовен тренд, добро испланиран, а не случајност, ВМРО-ДПМНЕ смета дека е неправедно, какво било натамошно гонење на лицата – учесници во немирите на 27 април“, стои во соопштението од ВМРО-ДПМНЕ.
„Сочувствуваме и жестоко ги осудивме повредувањата на пратениците на 27 април. Но, не сметаме дека нивните рани повеќе болат, од раните на оние лица, чии сторители наскоро ќе бидат ослободени со Законот за амнестија, веднаш по изборите. Уште помалку цениме дека делата за кои што се товарат овие лица се поважни од животите на убиените млади лица, кај Смилковското Езеро и редица други повреди сторени од лица, што веќе се наоѓаат на слобода или наскоро ќе се најдат на слобода со политички договор помеѓу коалициските партнери на власта или со политичка одлука или интервенција на СДС“, стои меѓу другото во партиското соопштение.
Моника Талеска
