Координаторите на пратеничките групи денеска се на средба со претседателот на Собранието, Талат Џафери, на која се очекува да се договори терминот за одржување на првата собраниска седница по завршувањето на локалните избори и идните активности на Парламентот.
Според информации од Собранието, на оваа седница би требало на дневен ред да биде и верификација на мандатите на нови пратеници кои доаѓаат на местото на сега веќе избраните седум градоначалници од СДСМ, како и на местата на двајца пратеници од албанскиот блок кои поднесоа оставки.
Пратеничката група на СДСМ ќе претрпи персонални промени откако градоначалници станаа на Скопје Петре Шилегов, на Карпош Стефан Богоев, на Шуто Оризари Курто Дудуш, на Куманово Максим Димитриевски, на Гевгелија Сашко Поцков, на Струмица Коста Јаневски и на Штип Благој Бочварски. Нивните пратенички места се очекува да ги заземат Татијана Лалчевска, Анета Симеска-Димоска, Лидија Тасевска, Ристе Ташев, Костадин Костадинов, Агим Муртезанов и Костадин Ацевски.
Неџбедин Каремани се очекува да го замени Билал Касами од Беса. На местото на Бардуљ Даути од ДПА, кој поднесе оставка, се очекува Мерал Узаири Ферати.
Б.Ј.
