Зборот политика потекнува од грчкиот збор Полис – град – граѓанство. До неодамна, мнозинството граѓани велеа не ме интересира политика, денеска бараат некој со волшебно стапче да им го реши проблемот со загадениот воздух. Со тоа повторно докажуваме колку сме нација на непораснати деца кои не ја гледаат личната одговорност во општеството и во промените.
Загадениот воздух е всушност најголемиот шамар за оние што велеа не ме интересира политика.
Па граѓани и граѓанки, политиката на увоз на возила според ЕУР 3 стандарди го донесе автомобилскиот крш што беше забранет во ЕУ. Политиката на сеча на парковите доведе до намалување на зеленилото. Политиката на грандоманија го огрде градот и го наполни со градежна прашина. Политиката на пропаганда доведе до тоа да не се извадат аргументите за загадувањето на маса и да се поттикне здрава и стручна дискусија. Јас пишував на тема узов на автомобилски крш, сечата на паркови, градежниот хаос, особено за Скопје 2014. Многумина како мене реагираа, протестираа, но бевме малцинство. Кога праќав до медиумите слики од загадувањето од Железара во Аеродром, само Фокус, Либертас, Призма и ТВ Нова објавуваа. Сопругот мој беше редовен “дописник” за загадувањето на Центарот за управување со кризи каде звонеше секоја вечер.
Но клучното прашање е што направивте вие?!? Од однесувањето и свеста на поединецот, зависи колективната благосостојба. Да ве интересираше политика, немаше да дојде до ова.
Не може граѓаните да бараат привилегии од власта, а да не ја согледаат сопствената одговорност во општеството. Промени ќе има кога ќе се почне од личната свест и одговорност.
До вчера имаше поплаки дека ќе се плаќа поголема акциза за дизелот како мерка да се намали загадувањето, денеска барате “некој” да ви го прочисти воздухот. Ако ЕУР стандардите се вратат во “нормала” и се забрани автомобилскиот крш, се недевам нема да протестирате, ако навистина барате решение за загадувањето?!? Се разбира дека и обратно, одговорноста на власта не е да ги ужива привилегииите туку да испорачува резултати. Ако помине неказнето, на пример, оној нов “кинески зид” во Тафталиџе во режија на Стевчо Јакимовски од кој тешко да има проток на воздух во цела населба, проблемот само ќе се зголемува. Релацијата граѓанство – власт во однос на барање отчетност, одговорност и испорака на резултати редно е да стане функционална. Но, и во двете насоки. Ако некој стопанственик сокрива даноци, смешно е да бара потоа повеќе пари од буџетот за стопанството нели?
Добро што реакциите по несреќната изјава на Шилегов и за загадувањето покажуваат дека граѓаните се заинтересирале конечно за политика. Одговорност треба да се бара, но не само кај властите, туку и кај сопствените постапки.
Ако е Македонија е заедничка, а не моја или твоја, така треба и да се однесуваме.
