Денес е 16.02. Немам ништо значајно да издвојам како настан на денот. Она што го обележа денешниот просветарски ден во Скопје е настан кој што не се случи. И денес нема јануарска плата за вработените во средните училишта во Скопје. Значи, најрано ќе бидеме исплатени во понеделник на 19.02. Уште еден очаен викенд.
Ако подобро размислам, тоа и не е така лошо. Инаку можеби ќе падневме во искушение да се растрошиме викендов по моловите кои нудат големи попусти и после… Ја снемало платата за два дена. Е па, ќе ја снема.
И, ете така, си седам и размислувам да му напишам едно писмо на благодарност на градоначалникот Шилегов што мисли на нас просветарите и ни помага да ги победиме нашите расипнички страсти и да се спасиме месецов што следува од беда. Така ни помогна и претходниот месец, и тој пред него, и пред тој…
И така, размислувајќи за убавите зборови со кои ќе му се заблагодарам на градоначалникот, почна да ми текнува на каматите кои ќе ми ги наплатат банките за минусите на картици, ЕВН за задоцнетото плаќање на струјата, БЕГ за парното, ВИП за телефонот и интернетот, водовод за водата. Затоа што сите тие сметки треба да се платат до 15 во месецот и на 16 веќе се пресметува месечна камата за задоцнето плаќање. А на нас никој не ни плаќа камати за доцнењето на платите.
Е тука веќе завршив со благодарноста и поминувам на лутина и бес. И друго писмо ми излетува по тастатурата:
Почитуван (ух, ова тешко ми излетува) градоначалник на град Скопје, Петре Шилегов,
Не знам дали сте информирани (а веројатно сте, затоа што вие ги потпишувате документите) дека во средните училишта во Скопје вработените немаат добиено плата за месец јануари. Како градоначалник и правник мора да знаете дека, според Законот за плати, платата за претходниот месец мора да биде исплатена до 15-ти во тековниот месец. Ние, просветните работници, неисплаќањето на платите во законскиот рок го нарекуваме доцнење на платите, но вие како правник треба да знаете дека тоа е погрешна терминологија и дека се работи за кршење на законот. Така, го прекршувате законот овој месец, го прекршивте претходниот, и тој пред него и тој пред… Не е важно дали се работи за десет, пет или два дена. Нема мали и поголеми кршења на законот, а законот за исплата на плати е јасен. До 15-ти.
Минативе денови, професорите од Скопје очајнички побараа од вас како градоначалник смени на заседнатите во фотелји режимски мобинг директори. Многу јасно одговоривте дека не можете да им удоволите на барањата, затоа што немате за тоа законски можности. Одговор за почит. Но, не е кршење на закон ако се санкционираат лица кои спроведуваат дискриминација и мобинг врз вработените. Напротив, тоа е владеење на правото и почитување на законот.
Затоа, што се однесува и до платите, очекувам од Вас да бидете доследни на самиот себе во почитување на законите и на барањето на професорите да ги добиваат платите според закон, до 15-ти во месецот, од следниот месец да одговорите позитивно.
Бидете поздравени до наредната плата која треба да ја исплатите до 15.03. Може и порано, на пример, на први, втори, трети… Нема да ви се налутиме. Петнаесет дати имате на располагање за да го испочитувате законот.