Поттикнати од протестите во Грција и Македонија како резултат на најавите за решавање на спорот со името, група граѓанки и граѓани формираа Фејсбук група „Грчко-македонско пријателство“.
Со фокус кон она што ги обединува земјите на Балканот, а не само Грција, ниту, пак само Македонија, како и за надминување на стравот и градење пријателство, отколку продлабочување на непријателството меѓу двете земји, поддржувачите на оваа група излегоа со следното соопштение:
„Во изминатите 25 години националистите во Македонија и во Грција постојано се расправаат за тоа кој е “вистинскиот” потомок на Александар Велики и наследникот на древната македонска цивилизација.
Меѓутоа ние, долупотпишаните, како и стотици илјади други луѓе секоја година ја преминуваме границата меѓу двете земји во било кој правец и сфаќаме дека “цивилизацијата” на друга држава воопшто не е поразлична од сопствената или пак е слична со кралството на древните Македонци.
Ако го одделиме јазикот, начинот на кој луѓето изгледаат, се облекуваат, се среќаваат, заљубуваат, пеат, јадат, пијат, пливаат, се молат е практично ист на двете страни на границата.
Никој не ги “украл” овие и оние културни елементи од другиот.
Сите овие елементи кои се споменуваат се наследство на целиот регион на Балканот.
Тие се наши заеднички пост-отоманско, 2.000+ годишно наследство во доцниот капитализам и ја носат традицијата на антиавторитарните и антифашистичките борби на 20 век, многу повеќе од античкото наследство на Аристотел или Олимпија.
Ние цврсто веруваме дека никој не поседува никакво име или културна традиција, и ниту еден национален идентитет не е повеќе или помалку “вештачки” од било кој друг.
Името Македонија, како и многуте македонски културни, музички, јазични и други традиции, не треба да бидат елемент на поделба меѓу земјите и народите, туку треба да се сметаат за заеднички, како заеднички ресурс и како врска меѓу популациите, почит кон самоопределувањето на сите, без оглед на нивното етничко потекло или бројот на години на кои тие биле присутни на Балканскиот полуостров.
Наместо да се обраќаме кон НАТО и другите моќни меѓународни организации како судии, во приод од врвот надолу треба да ги отвориме очите и да видиме дека сомнежот и омразата најдобро се одбегнуваат одоздола, кога луѓето ги сфаќаат нивните заеднички карактеристики и ги прифаќаат нивните разлики без да ги трансформираат во бинарни опозиции.
Балканските општества досега имаа доволно страдања.
Време е да се фокусираме на сè што го обединува Балканот – не само Грција, ниту Македонија.
Нема ништо од што да се плашиме … Можеме да бидеме пријатели и можеме да го докажеме тоа.“
Б.Ј.
