Министерството за внатрешни работи, конечно ги даде одговорите на прашањата што ЦИВИЛ Медиа ги постави за случајот пријавен од граѓански новинар и објавен како „Националистичка кампања на ќосињата“.
МВР на прашањето дали има пријава за овој настан, односно испишани пораки со зборовите „Не купувајте од Шиптаришта“ со потпис „Ќосето“, што се појавија на повеќе автомобили во подземниот паркинг на ГТЦна22 февруари, одговори дека немааттаква информација.
„Ве известуваме дека по извршените проверки во Билтенот на СВР Скопје за 2018 година, како и по извршена телефонска консултација со Полициската станица Центар таков настан не е пријавен ниту евидентиран во СВР Скопје“, одговорија од МВР.
Но, на прашањето, дали ќе преземат нешто во врска со овој настан, МВР не одгворија на прашањето.
„Во врска со тоа какви мерки се преземаaт не само за сторителите на вакви прекршоци, туку за било каков пријавен и евидентиран настан на станично подрачје на СВР Скопје, Ве известуваме дека организационите единици на СВР Скопје и полициски службеници во СВР Скопје на дневна основа преземаат мерки и активности согласно член 5 од Законот за полиција, односно преземаат дејствија кои се однесуваат на заштита на животот, личната сигурност и имотот на граѓаните, заштита на слободите и правата на човекот и граѓанинот гарантирани со Уставот на Република Македонија, законите и ратификуваните меѓународни договори; спречување на вршење кривични дела и прекршоци, откривање и фаќање на нивните сторители и преземање на други со закон определени мерки за гонење на сторителите на тие дела, одржување на јавниот ред и мир регулирање и контрола на сообраќајот на патиштата, укажување помош и заштита на граѓаните во случај на неопходна потреба, обезбедување на определени личности и објекти и други работи утврдени со закон“, одговорија од МВР.
Односно, нивниот одговор содржи попис на задолженија на полициските служби, но не и конкретен одговор дали воопшто нешто би презеле да се најде сторителот во конкретниот случај, бидејќи како што стои во одговорот тоа е дел од нивните задолженија.
Б. Јордановска
