Скопскиот градоначалникот Петре Шилегов денеска рече дека луѓето кои беа изгласани за членови на Управни и надзорни одбори се познати и ги задоволуваат законските стандарди.
– Станува збор за промена на партиските кадри и инсталации кои ВМРО-ДПМНЕ ги имаше инсталирано во Управните и надзорните одбори на јавните претпријатија и институциите кои се под ингеренција на Град Скопје. Во одлуката, која ја носеше Советот на Град Скопје, првпат се случи професионалната админстрација, дел од Град Скопје да земе учество во надзорните и управните одобри. Очигледна е нивната болка што повеќе не се фактор за носење стратешки одлуки во Градот, изјави Шилегов пред почетокот на првата вонредна седница на Советот на Град Скопје.
Импутирањата за некави незаконитости и недоследности, како што рече, не се ништо друго туку ширење на лажни вести, евтин популизам, промоција и продолжување на примитивизмот во политиката.
Според него, ВМРО-ДПМНЕ викендов и денеска се обидува да ја дефокусира јавноста од одлуката донесена на минатата седница. Конечно од 1971 година, како што рече, првпат комплексот на Железарница Скопје ќе почне да плаќа вода.
Советничката група на ВМРО-ДПМНЕ во Советот на Град Скопје денеска повторно обвини дека се именувани над 100-тина членови на Управни и надзорни одбори, спротивно на законот.
– Нашиот сомнеж за незаконското делување го темелиме на фактот дека тие одбиваат транспарентност и објавување на биографиите на луѓето кои се назначени за членови на одборотие. Од информации од медиумите веќе е познато дека меѓу лицата има партиски функционери на СДСМ, лица вработени во Град Скопје, Владата и кабинетот на Заев, а се сомнични дека меѓу нив има и лица гонети за тешки кривични дела, изјави советничката во Советот на Град Скопје од ВМРО-ДПМНЕ Јелена Жугиќ.
Според неа, Шилегов и Јанчева се ставаат над законот, протуркувајќи скандалозни предлози. Шилегов, како што рече, ветуваше професионализација на институциите, а се добија целосно партиски институции, неефикасни во своето делување.
Советниците во Советот на Град Скопје на денешната прва вонредна седница ги усвоија измените и дополнувањата на програмата за општа туристичка пропаганда и подобрување на условите за престој на туристите во градот Скопје и програмата за финансирање на проекти за развој на занаетчиство, угостителство и трговија во Град Скопје, и двете за 2018 година.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
