Македонската асоцијација на новинари (МАН) го осудува директорот на МИА, Антоновски, поради суспензијата на нивниот потпретседател Чилиманов. Според оваа организација, тој има право приватно да се изјаснува како сака, односно – не е проблем да повикува на силување на колешка, странска новинарка.
За оние кои не разбраа за случката, еве една мала „рекапитулација“… За време на референдумското изјаснување минатата недела, новинарката на Фајненшл Тајмс, Валери Хопкинс, престојувајќи во Скопје, имала разговор со таксист, кој ѝ рекол дека сите соседни земји и цел свет да ти биле против Македонија. Таа го сподели тој разговор на Твитер, што го предизвика Цветина да ги повика сите таксисти што го следат, ако случајно им влезе новинарката во такси, да ѝ го направат она што го направи фамозниот таксист Чичко Кумплунг на девојката на неговиот син во филмот „Самоуништување“. Следуваа бурни реакции од јавноста, не само од Македонија, а МИА го суспендираше Чилиманов, кој веќе неколку години работи во државната новинска агенција.
И, сега, ете го МАН со јавна осуда. Не на повикот на силување, туку на суспензијата.
Добро е за овој став на оваа организација да се информираат Меѓународната федерација на новинари, ЕФЈ, ИПИ, Репортери без граници, Article 19… па и комесарите на ОН и на ОБСЕ за слобода на изразување, кои го осудија токму тој став на Чилиманов.
Да ве потсетам, МАН делегира свои претставници и во Советот на Агенцијата за медиуми и во Советот на МРТ, со медиумските закони на Грујо. Ги плаќаме сите ние. Да ве потсетам, дека Чилиманов беше делегат на ВМРО во ад-хок медиумското тело за изборите во 2016та.
И на крај, да ве потсетам дека истиот овој Чилиманов повеќепати јавно поттикнуваше насилство. Кон мене лично, како што се гледа од приложеново, изразува жалење зошто закочил и не ме згазил со кола. Има насилнички коментари за Героски, а подолу на истава фотка има нешто да каже и за венецот кој му го носеа на врата на новинарот Борјан Јовановски неговите истомисленици.
Деклем, Цветин одамна ја ширеше својата слободољубива миризба, ја осеќавме само ние, ал деновиве таа излезе и се прошири глобално. Зато, да поновим, за ставот на МАН за осуда врз Антоновски и загрозувањето на правото на Цветин да повикува на силување треба да дознае цел светски новинарски еснаф. Греота е неговата слава и борба така брзо да паднат во заборав…
Услови за користење, авторски права и заштита на приватноста
Преземање на содржините под различни услови од наведените НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
