Агенција за национална безбедност е името на новата институција задолжена за безбедност и контраразузнавање, која треба да ја замени сегашната Управа за безбедност и контраразузнавање (УБК). Насловот на институцијата, која во првата верзија на новиот закон беше Агенција за внатрешно разузнавање, е сменет за попрецизно да го отслика делокругот на нејзината работа.
Покрај оваа, навидум козметичка, промена, во тек се и интервенции во текстовите на сите пет закони од пакетот за реформи, најавува предлагачот, Министерството за внатрешни работи. Во моментов, пакетот закони за реформи на безбедносниот систем ги опфаќа новите предлог-закони за координација на безбедносно-разузнавачката заедница, за Агенција за внатрешно разузнавање (оригиналниот наслов), и измени на законите за внатрешни работи, за странци и за следење на комуникациите.
„Процесот на реформи сеуште не е завршен и во периодот што следи се очекуваат измени на други законски решенија, вклучително и на Закоонот за Агенција за разузнавање, што ќе предизвика евентуална измена на постојни или креирање на нови законски решенија“ – најавува МВР.
На 15 јануари заврши периодот од два месеци во кој требаше да биде подготвена конечната верзија на текстовите на петте законски решенија од пакетот. Оригиналните текстови, според МВР, досега претрпеле значајни интервенции.
„Изготвувањето на Предлогот на Закон за Агенција за национална безбедност е резултат на компаративно искуство и учество на сите релевантни субјекти во државата, вклучително и невладини организации и професори, при што е јасно разграничено дека кривичните постапки согласно Законот за кривичната постапка се процесуираат од страна на јавен обвинител и правосудната полиција, а безбедноста е предмет на уредување на повеќе матични закони, вклучувајќи ги и Законот за Агенција за национална безбедност, Законот за координација на безбедносно-разузнавачката заедница. Воедно укажуваме дека процесот на реформи на безбедносните служби е сéуште во тек, при што ќе следат нови измени на повеќе законски решенија“ – наведува МВР како одговор на дел од критиките упатени кон предложените текстови.
Паралелно со пакетот закони за реформи на безбедносно-разузнавачкиот систем, во тек е и постапка за донесување на нов Закон за класифицирани информации, чиј носител е Министерството за одбрана и Дирекцијата за безбедност на класифицирани информации.
Игор К. Илиевски
Овој прилог е дел од серијата текстови засновани на мониторингот на ЦИВИЛ на реформските процеси во безбедносниот сектор во земјата.
