Организациите „Амнести интернешнл“ (Amnesty International) и „Заштитници на граѓански права“ (Civil Rights Defenders) издадоа заедничка изјава во која наведуваат дека „видеата од српската интервентна полиција како напаѓа мирни демонстранти собрани на уличните блокади и пред универзитетот во Белград се алармантни“.
„Има голем број апсења и бројни обвинувања за прекумерна или на друг начин незаконска употреба на сила против студенти – како за време на самите протести, така и за време на апсењата и притворањата од страна на полицијата. Властите мора итно да истражат и да ги објаснат информациите за маскирани лица во цивилна облека кои ги напаѓаат демонстрантите“, се вели во соопштението.
Се додава дека „иако државата има одговорност да обезбеди јавен ред и да одговори на поединечни инциденти на насилство, употребата на сила мора да биде последно средство и секогаш строго неопходно и пропорционално за да се постигне легитимна цел“.
„Грубото потиснување на мирното несогласување не може да се оправда. Српските власти мора да дејствуваат воздржано и да обезбедат граѓаните да можат безбедно да учествуваат во протестите и слободно да го изразат своето незадоволство без страв од заплашување, вознемирување или насилство. Недејствувањето во оваа насока може дополнително да ги зголеми тензиите. Случаите на незаконска употреба на сила од страна на полицијата мора итно и независно да се истражат, а полицајците за кои постои сомневање дека дејствувале незаконски мора да бидат одговорни пред законот.
Се додава дека „лидерите на ЕУ треба јасно и недвосмислено да го осудат секое кршење на човековите права на демонстрантите и да нагласат дека обезбедувањето на правото на мирно собирање и слободата на изразување е клучно во процесот на пристапување на Србија кон Унијаta“.
Во Белград, Нови Сад, Шабац, Крушевац, Крагуевац, Ваљево, Смедерево и други градови, на повик на студенти и граѓански собири беа организирани блокади на патиштата, а дел од нив продолжуваат и вечерва.
Во исто време, полицијата приведе дел од собраните на различни локации, вклучувајќи малолетници, студенти, професори, граѓани…
