„Во 2017 состојбите беа вознемирувачки и хаотични, заради политичкиот живот, и ова влијаеше многу на приватниот и јавниот урбан живот. Иако без некоја надеж, затоа што надежта ми се изгуби, сепак, се надевам дека можеби ќе биде подобро, меѓутоа, што се однесува до политичкиот и до јавниот живот, не верувам, веќе 25 години му робуваме на некого, изјави Идриз Амети, музичар, во разговор со ЦИВИЛ Медиа за Перспективи 2018.
„Што се однесува до музичката сцена, имам голем надевања и воља, и сакам…во 2017 имаше многу изданија на рокенрол сцената во Македонија, и дека еден голем број се во винил, лонгплеј плочи. Мојата прогноза за идната година е дека ќе има уште повеќе изданија, затоа што сцената е зголемена и се развива убаво, изгледа малку влијаеше и смената на власта, не знам точно, не сум многу во тек, но сакам да верувам дека е така. Надежта, како што кажав, одамна ми е изгубена така што моите надежи ќе ги претворам во воља. Посакувам во новата 2018 година да ни се случуваат многу поубави и попоѕитивни работи, на пример, сакам на нашиве простори да помине еден мега бенд како што е „Ролинг Стоунс“, „Ју2“,„Перл Џем“, и многу други, тие никогаш не дојдоа кај нас. Нашите соседи ги добија „Ролинг Стоунс“ и „Перл Џем“, ние никогаш“, изрази надеж Амети.
„Тоа би било добро и за државниот имиџ, ова треба да го знаат и тие што се на високи позиции. Друго, посакувам во 2018 командант „Скита“ да даде оставка, итно, доста беше. Колку и да сум на страна од јавниот живот, затоа што сум многу фокусиран во музика, влијае неговото присуство, влијае тој непрокопсан и не би сакал повеќе да бидам во негова близина. Значи, итно треба да даде оставка, и, втората работа што посакувам да се случи, е времето, можеби е малку доцна, но можеби е добро да се легализира канабисот, дури и да се декриминализира, луѓето треба да живеат, знаат за што се работи, знаат зошто е илегална употребата и зошто е таму каде што е, свесни сме, имаме информации, светот е отворен, имаме интернет и ги имаме сите потребни работи што ни укажуваат дека канабисот е едно многу потребно растение за човекот што живее на овој свет“, објасни Амети.
„Затоа, со благодарност, се надевам дека моиве желби ќе допрат до некого. Многу е едноставно да се направи еден закон, еден предлог закон, и тоа да оди на гласање, и ако не се изгласа, не е проблем, но да има обид, луѓето да пробаат да го протурат проект-законот во собрание и да го гласаат, и ако не се изгласа следната година, нема врска, но треба да се почне. Тие се моите желби за 2018 година, и како и секогаш, многу љубов, здравје и со отворени умови да одиме напред, затоа што сметам и верувам дека работите полека почнуваат да се движат, тука сме за да ги забрзаме ако ни верувате малку повеќе, ако не, ќе останеме таму каде што бевме пред две -три години..“, порача Идриз Амети за новата 2018 година.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество.
„Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера: Дехран Муратов
Обработка на текст: Ариан Мехмети
