ЦИВИЛ Медиа разговараше и со Тихомир Јанчовски, дел од Комисијата на Агенцијата за млади и спорт што одлучуваше за трите најдобри песни што влегоа во збирката поезија „Млади поети“.
Комисијата реагираше преку соопштение на изјавата на Каевски во која го прочита решението за тоа како се вршела селекција за песните, а Јанчовски дополнително на својот Фејсбук профил ја објасни улогата на Комисијата.
Во телефонски разговор за ЦИВИЛ Медиа, Јанчовски вели дека иако не е човек за на суд, доколку скандалот не добие поинаква разрешница ќе мора да го стори и тоа.
„Ако продолжи вака да се развива ситуацијата, ако не напаѓаат, а се чувствуваме дека немаме никаква вина, можеби и ќе тужиме. Ако нема потреба, нема. Јас не сум за по судови да се влече работата. Ако продолжи АМС да се вади и да префрла вина, ако е неопходно тогаш, да!“, вели Јанчовски.
„Каевски извади некакво решение што никој не го видел, а прашање е дали тоа решение сега е направено и ставена датум од претходно. Од кај да знаеме. Не можеш да докажеш. Нам никој не ни го покажал тоа решение“, истакнува тој.
„Ова не им е прва ваква книга, ама досега никој не се бунел. Идејата е да биде масовно, млади да објавуваат… Ние си завршивме, одредивме прво, второ и трето место и толку. Со тиражот, насловната страна, издавачот немаме никаква врска. Никој не збори за наградените песни, туку за двете објавени на тој што ги подметнал, постариот ресенчанец. За нашата работа добивме хонорар по 5.000 денари“, објасни Јанчовски во разговор со ЦИВИЛ Медиа.
На својот Фејсбук профил Јанчовски вели дека првпат за книгата слушнал на доделувањето на наградите. Од тогаш, па до сега никој не им се јавил нити ги консултирал за книгата.
„Не сме правеле никаква селекција, ниту некој од нас барал некаков извештај. Селекцијата на песните што се застапени во книгата не е направена од нас. Ние направивме избор на првонагредените три песни и толку“, се вели во неговиот статус.
„Книгата е објавена, и никој не очекувал скандал. Поезија… млади… Откако изби скандалот, директорот на АМС ја префрла вината врз нас. Тоа е очекувано. Ако вината е до АМС, а тој е таму директор, ќе му речат да си даде оставка. Новинарите ги љубат скандалите и едвај чекаат такво нешто. Покажувал пред камери некакво решение. кое никој од нас никогаш не го видел, и на кое нема потпис на ниеден од нас“, образложи Јанчевски.
Радица Стојанова, Елена Богдановска и Никола Димитриевски се добитниците на трите први награди од Комисијата.
За крај, Јанчевски искоментира дека доколку некој него го прашал што треба да влезе во книгата, можно е таа воопшто да не биде ни објавена.
Биљана Јордановска
