Една година по нелегитимните избори за претседател на Студентскиот парламент, што се одвиваше надвор од Статутот на УКИМ, а кои завршија со насилно одземање на гласачките кутии од лица кои не беа студенти и насилство врз студентите кои протестираа пред канцеларијата на Студентскиот парламент, сè уште нема правна разрешница! Студентскиот пленум тогаш побараа од Ректоратот на УКИМ да ги поништи студентските избори и да ги прогласи за неважечки. Сепак, една година подоцна, Давор Поповски сè уште е нелегитимен претседател.
За минатогодинешните настани ЦИВИЛ Медиа разговараше со младинската активистка Александра Филипова.
„Она што се случи на 30-ти јуни 2016 е срам и за Универзитетот и за една држава која се класифицира како демократска. Употребата на прекумерна сила од страна на Единицата за брзо разузнавање врз студенти кои само сакаат да го поправат студентското организирање е дело кое треба да се казни. Хелсиншкиот комитет за човекови права на Македонија поднесе кривична пријава, меѓутоа дури и неколку месеци подоцна, нема никаков одговор од надлежните институции“, смета Филипова.
Според неа, ако сакаме да се поместиме од статус кво позицијата, најпрво мора да има казна за службениците кои ја употребија прекумерната сила, одговорност за сите членови на Студентскиот парламент кои фалсификуваа потписи и не доставија извештај до јавноста за потрошените пари. Исто така, Филипова посочува дека е потребна реакција и желба на Универзитетот да го реши проблемот со студентското организирање, наместо да го игнорира проблемот.
„Токму поради овие работи, големи се очекувањата од новата политичка гарнитура. Најпрвин, треба да креираат политики во соработка со сите засегнати страни, а понатаму, да сфатат дека одредени проблеми мора да се решат за да има унапредување на високото образование и студентското организирање“, вели Филипова.
Марија Теговска